Ar ran Llywodraeth Cymru, mae CGA yn gyfrifol am weinyddu’r rhaglenni sefydlu, Datblygiad Proffesiynol Cynnar (DPC) a’r radd Meistr mewn Addysg).

Yng Nghymru, mae’n ofynnol i’r holl Athrawon Newydd Gymhwyso (ANG) a gafodd Statws Athro Cymwysedig (SAC) o 1 Ebrill 2003 ymlaen gwblhau cyfnod sefydlu statudol.

Mae’r rhaglenni Datblygiad Proffesiynol Cynnar a’r radd Meistr mewn Addysg wedi dod i ben. Mae CGA yn dal i gadw cofnodion am yr arian a ryddhawyd mewn perthynas â’r rhaglen Datblygiad Proffesiynol Cynnar, ynghyd â manylion y rhai a gymerodd ran yn y rhaglen gradd Meistr a’r cymhwyster a ddyfarnwyd.

Ble yr ydym yn cael eich gwybodaeth

Caiff y wybodaeth yr ydym yn ei dal ei chasglu trwy ddulliau amrywiol gan gynnwys;

• y Gofrestr Ymarferwyr Addysg
• Gwaith papur sefydlu perthnasol gan gynnwys y Ffurflen Hysbysu Sefydlu, Ffurflen Hysbysu Athro Cyflenwi Byrdymor a’r Ffurflen Hawlio Cyllid Sefydlu
• Gwybodaeth a ddarparwyd gan eich cyflogwr a all gynnwys eich ysgol, asiantaeth cyflenwi, Awdurdod Lleol neu gonsortia addysg rhanbarthol
• Gwybodaeth a roesoch wrth gysylltu â CGA. Gall hyn fod yn gyfathrebu ysgrifenedig neu ar lafa
• Nid ydym yn casglu unrhyw ddata ynghylch hil na chredau crefyddol.

Pa wybodaeth bersonol yr ydym yn ei chasglu

Er mwyn gweinyddu’r rhaglenni Sefydlu, gradd Meistr mewn Addysg a Datblygiad Proffesiynol Cynnar yng Nghymru, mae’n ofynnol inni ddal y wybodaeth ganlynol amdanoch;

• Eich enw
• Rhif Cyfeirnod Athro
• Dyddiad geni
• Manylion cyswllt gan gynnwys cyfeiriad cartref, cyfeiriad e-bost a rhif ffôn
• Manylion cyflogaeth, gan gynnwys data cyfredol a hanesyddol
• Manylion cymwysterau
• Manylion am eich statws cofrestru gyda CGA, gan gynnwys data cyfredol a hanesyddol
• Manylion am eich dewis iaith ar gyfer cwblhau’r broses sefydlu. Caiff y data hyn eu casglu er mwyn sicrhau y caiff GA ei ddyrannu i chi sy’n gallu eich cefnogi trwy’r broses sefydlu yn eich dewis iaith.

Sut yr ydym yn defnyddio’ch gwybodaeth

Mae CGA yn cyflawni nifer o weithgareddau gweinyddol mewn perthynas â’r rhaglenni sefydlu, Datblygiad Proffesiynol Cynnar a’r radd Meistr mewn Addysg, gan gynnwys:

• cynnal ffynhonnell ganolog o ddata i athrawon sy’n cyflawni’r broses sefydlu, gan gynnwys cynnal cofnod o’u manylion cyflogaeth wrth iddynt gwblhau’r broses, cofnod o’r sesiynau a gwblhawyd, a manylion eu Mentor Sefydlu (MS) a’r Gwiriwr Allanol (GA) a ddyrannwyd iddynt;
• rhannu’r wybodaeth hon gyda phartïon eraill sy’n ymwneud â’r broses o ddarparu’r rhaglen sefydlu. Mae’r rhain yn cynnwys yr ANG, MS, GA a’r cydgysylltydd sefydlu yn yr awdurdod lleol (ALl)/consortia addysg rhanbarthol fel y Corff Priodol ar gyfer sefydlu;
• gweinyddu cyllid sefydlu i ysgolion a chyllid ar gyfer darparu rôl y Gwiriwr Allanol i’r consortia addysg rhanbarthol a chyflogwr y GA;
• lletya a chynnig mynediad i’r Proffil Sefydlu statudol ar-lein trwy’r Pasbort Dysgu Proffesiynol. I gael gwybodaeth am sut caiff eich data eu defnyddio yn y pasbort, dylech gyfeirio at ein hysbysiad preifatrwydd sydd ar gael yma;
• cyhoeddi tystysgrifau sefydlu ar sail y canlyniadau sefydlu a ddarperir gan y Corff Priodol;
• tasgau gweinyddol eraill mewn perthynas â gweinyddu’r rhaglen sefydlu fel y gofynnir amdanynt gan Lywodraeth Cymru. Gellir rhannu data gyda’r unigolyn mae’n ofynnol iddo gwblhau’r broses sefydlu, ei gyflogwr a all gynnwys ysgol, asiantaeth cyflenwi neu Awdurdod Lleol, Llywodraeth Cymru a’r consortia addysg rhanbarthol;
• cynnal manylion y rhai sydd wedi cymryd rhan yn y rhaglenni Datblygiad Proffesiynol Cynnar a’r radd Meistr mewn Addysg. Mae’r wybodaeth a ddelir yn cynnwys manylion y cyllid Datblygiad Proffesiynol Cynnar a ryddhawyd, a’r modiwlau a gwblhawyd a’r cymwysterau a enillwyd gan y rhai a gymerodd ran yn y rhaglen gradd Meistr mewn Addysg.

Pam mae ein defnydd o’ch data personol yn gyfreithlon

Y brif sail gyfreithiol yr ydym yn dibynnu arni i brosesu data personol yw erthygl 6(1)(e) o’r Rheoliad Cyffredinol ar Ddiogelu Data, sy’n caniatáu inni brosesu data personol pan fo angen hyn i gyflawni ein tasgau cyhoeddus fel rheoleiddiwr.

Caiff data ynghylch cyfranogiad unigolyn yn y rhaglenni Sefydlu, Datblygiad Proffesiynol Cynnar a’r radd Meistr mewn Addysg eu storio’n electronig ar Gofrestr Ymarferwyr Addysg CGA, a ddarperir gan MillerTech Ltd.

Er mwyn inni gyflawni ein tasg gyhoeddus mewn perthynas â sefydlu statudol yng Nghymru, rydym yn rhannu gwybodaeth gyda thrydydd partïon sydd hefyd yn chwarae rhan yn y rhaglen sefydlu. Mae’r rhain yn cynnwys:

• Mentoriaid Sefydlu
• Gwirwyr Allanol
• Cydgysylltwyr Sefydlu yn yr Awdurdod Lleol/ consortia addysg rhanbarthol
• Llywodraeth Cymru
• Cyflogwyr, gall hyn gynnwys ysgolion, asiantaethau cyflenwi neu Awdurdodau Lleol

Caiff y wybodaeth hon ei rhannu’n electronig trwy gyfleuster gwasanaethau ar-lein CGA. Dim ond yn ystod y cyfnod sefydlu bydd gan y partïon hyn hawl i weld eich gwybodaeth. Cliciwch yma i ddarllen ein polisi rhannu data.

Os bydd angen inni gysylltu drwy e-bost â chi, eich MS, GA neu Gydgysylltydd Sefydlu ynghylch eich sefydlu, ac mae’r neges yn cynnwys gwybodaeth bersonol, caiff y neges ei hanfon drwy system Egress, sy’n feddalwedd i anfon negeseuon e-bost a throsglwyddo ffeiliau’n ddiogel.

Mae’n ofynnol inni ddarparu data ystadegol i Lywodraeth Cymru a rhanddeiliaid allweddol eraill mewn perthynas â’r rhaglen sefydlu yng Nghymru. Wrth gynhyrchu’r data a’u rhannu, rydym yn sicrhau nad oes modd adnabod unigolion a chaiff unrhyw ddata eu rhannu’n ddiogel yn unol â’n Polisi Rhannu Data.

.