EWC Logo

CGA / EWC

About us banner
EWC latest news
EWC latest news

Nodau

Nod y darn hwn ar Ddeall y Jargon yw creu canllaw syml y bwriedir iddo resymoli iaith y Marc Ansawdd Gwaith Ieuenctid i gydweithwyr yn y sector gwirfoddol a’r sector statudol yng Nghymru. Mae llawer o’r bobl sy’n cynorthwyo pobl ifanc yn y sector yn weithwyr rhan-amser neu’n wirfoddolwyr ac nid ydyn nhw’n rhy gyfarwydd â’r iaith a ddefnyddir yn y sector. Mae hyn yn rhwystr ychwanegol i’w cyfranogiad a’u cynhwysiad yn y Marc Ansawdd i ddangos y gwaith da iawn maen nhw’n ei wneud gyda phobl ifanc.

Cyfarfod â’r sector

Wrth baratoi’r canllaw hwn, cyfwelwyd â gwahanol sefydliadau a gofynnwyd cyfres o gwestiynau iddyn nhw. Cynhaliwyd y cyfweliadau hyn naill ai dros y ffôn neu’n rhithwir. Cyfwelwyd ag amrywiaeth fawr o glybiau gwirfoddol a chydweithwyr mewn awdurdodau lleol. Roedd y rhain yn amrywio o glybiau ieuenctid bach sy’n cyfarfod unwaith yr wythnos i brosiectau gwaith ieuenctid mwy gyda thîm bach o staff..

Esbonio’r Marc Ansawdd

Mae rhai gweithwyr ieuenctid a grwpiau ieuenctid gwirfoddol yn dal i fod yn anymwybodol, neu ddim ond yn rhannol ymwybodol, o’r Marc Ansawdd ar gyfer Gwaith Ieuenctid yng Nghymru. Un elfen o’r cyfweliadau oedd gadael i’r gwirfoddolwyr wybod mwy am y Marc Ansawdd a gwaith Cyngor y Gweithlu Addysg (CGA).

Rhoddwyd gwybod i’r rhai a gymerodd ran bod y Marc Ansawdd Gwaith Ieuenctid yn cynnwys 3 lefel, sef Efydd, Arian ac Aur. Mae gan bob un 4 safon, gyda 3 dangosydd. Er mwyn cyrraedd y safon mae gan bob dangosydd feini prawf mesuradwy.

Yr enw ar y meini prawf mesuradwy yw’r Disgrifyddion Gradd.

  • Ymarfer da,
  • Angen rhywfaint o ddatblygu, ac
  • Angen datblygu sylweddol

Mae'r Disgrifyddion Gradd wedi cael eu datblygu i helpu sefydliadau i ddeall pa mor dda maen nhw’n gwneud yn erbyn pob un o’r dangosyddion a beth y gallai fod ei angen i’w helpu i symud ymlaen.

Cyfeirir at y Marc Ansawdd ar gyfer Gwaith Ieuenctid yng Nghymru fel ‘y Marc Ansawdd’ yn y ddogfen hon.


Cyflwyniad i’r Marc Ansawdd

Y Lefel Efydd

Mae'r Marc Ansawdd yn gyfle i sefydliadau ddathlu eu gwaith gyda phobl ifanc trwy gyflwyno dogfen hunanasesu a chyfarfod â gweithwyr ieuenctid eraill (aseswyr) o sefydliadau yng Nghymru er mwyn gweld a yw’r sefydliad yn bodloni’r meini prawf i gael un o’r tair lefel – Efydd, Arian ac Aur.

Lefel gyntaf y Marc Ansawdd yw’r Lefel Efydd. Mae'r dyfarniad hwn yn canolbwyntio ar y camau cyntaf ac yn edrych ar yr hyn mae’ch sefydliad yn ei wneud, sut mae wedi’i strwythuro, sut mae’n cael ei reoli gan yr ymddiriedolwyr a sut mae’n gwneud “gwaith ieuenctid da”.

Anogir pob sefydliad gwaith ieuenctid yng Nghymru i ymgeisio am y Lefel Efydd. Rhaid i sefydliadau ddangos bod ganddyn nhw arweinyddiaeth a llywodraethiant priodol, bod ganddyn nhw brosesau i fonitro a gwerthuso eu rhaglenni, a’u bod yn sicrhau bod pobl ifanc, staff a gwirfoddolwyr yn ddiogel a’u bod yn cydymffurfio â’r gofynion cyfreithiol.

Mae Strategaeth Gwaith Ieuenctid Cymru (2019) yn nodi gweledigaeth ar gyfer y dyfodol lle mae:
“pob person ifanc yn ffynnu, ac yn cael mynediad at gyfleoedd a phrofiadau, yn y Gymraeg a’r Saesneg, sy’n rhoi mwynhad ac yn cyfoethogi eu datblygiad personol drwy waith ieuenctid”.

Mae'r Lefel Efydd yn cynnwys pedwar maes, sef:

  1. Rheoli perfformiad
  2. Ansawdd gwaith ieuenctid,
  3. Dysgu a datblygiad pobl ifanc, a
  4. Gofynion cyfreithiol.

Efydd: Mae pobl ifanc yn ddiogel ac yn gallu ffynnu

Y Lefel Efydd yw’r cam cyntaf ar daith y Marc Ansawdd ac i gyrraedd y lefel hon mae angen i sefydliadau fodloni’r meini prawf isod.

Mae'r tabl isod yn dangos y safonau a’r dangosyddion ond hefyd yn esbonio beth mae hyn yn ei olygu.

Safon Ansawdd Dangosyddion Beth mae hyn yn ei olygu
1.1 Rheoli perfformiad Mae gan y sefydliad ddatganiad neu weledigaeth sydd wedi’i nodi’n glir ac mae ganddo strategaeth a/neu gynllun(iau) ar gyfer ei waith gyda phobl ifanc. Gall eich sefydliad ddangos beth rydych chi’n ei wneud, sut mae’n cael ei ddarparu, pryd mae’n cael ei ddarparu a ble. Mae gan eich sefydliad gyfansoddiad (neu ddogfen lywodraethu arall) sy’n dweud beth rydych chi’n ei wneud a sut rydych chi’n ei wneud. Gallwch ddangos i’r aseswyr beth rydych eisiau ei gyflawni i bobl ifanc, a sut y byddwch yn cyrraedd yno.
  Mae cynllun sy’n dangos sut mae’r sefydliad yn mesur effaith ac effeithiolrwydd ei waith gyda phobl ifanc. Mae aelodau’ch sefydliad, gan gynnwys pobl ifanc, yn deall ac wedi cyfrannu at weledigaeth, cynlluniau a blaenoriaethau’ch sefydliad, gan gynnwys sut y byddwch yn gwirio eich bod yn cyflawni’r blaenoriaethau hynny.
  Mae’r sefydliad yn defnyddio dull systematig yn rheolaidd ar gyfer monitro, adolygu a diwygio’i gynllun(iau) sefydliadol a’i dargedau a/neu ei ddangosyddion perfformiad. Mae’ch sefydliad yn monitro cynlluniau’n rheolaidd ac yn eu newid pan fo angen. Dylai’ch sefydliad ddangos eich bod yn cadw cofnodion o brosiectau a dangos sut mae pobl ifanc yn datblygu trwy eu hymwneud â’r sefydliad. Mae’ch sefydliad yn gwrando ar adborth y bobl ifanc ac yn newid ei ddarpariaeth yn unol â hynny.
  Mae’r sefydliad yn gallu cysylltu ei waith â pholisïau lleol a chenedlaethol allweddol, a/neu strategaethau a blaenoriaethau ar gyfer pobl ifanc. Gall eich sefydliad ddangos eich bod yn ymwybodol o anghenion pobl ifanc a’r gymuned a’ch bod yn ymwybodol o bolisïau lleol a chenedlaethol ar waith ieuenctid a bod eich sefydliad yn cymryd hyn i ystyriaeth.
1.2 Ansawdd ymarfer gwaith ieuenctid Mae gweithlu’r sefydliad yn deall anghenion ardaloedd lleol ac anghenion y bobl ifanc maent yn gweithio gyda nhw.

 

Mae'r bobl sy’n gweithio gyda phobl ifanc yn eich sefydliad yn deall sut mae eu rôl yn cefnogi’r hyn mae pobl ifanc ei eisiau a’i angen yn ogystal â rhai’r gymuned leol.

Mae gweithgareddau gwaith ieuenctid yn rhoi sylw i anghenion pobl ifanc ac yn eu diwallu e.e. gallai hyn gynnwys trwy chwaraeon neu gelfyddydau gan gynnwys defnyddio platfformau cyfryngau digidol a chyfleoedd dysgu cyfunol – os yw hyn yn berthnasol i’ch sefydliad.

Mae’ch sefydliad yn helpu pobl ifanc (trwy gyfeirio) i ddod o hyd i wasanaethau cymorth a ffynonellau gwybodaeth, cyngor a chyfarwyddyd y gall fod arnyn nhw eu hangen.

Mae'r sefydliad yn deall y problemau mae pobl ifanc yn eu hwynebu ac yn gwrando ar eu pryderon.

 

  Mae gweithlu’r sefydliad yn ymgysylltu â phobl ifanc wrth gynllunio a gwerthuso gweithgareddau.

 

Mae’ch sefydliad yn cynnwys pobl ifanc wrth benderfynu beth mae’ch sefydliad yn ei wneud. Mae hefyd yn cynnwys pobl ifanc wrth werthuso’ch gwaith i weld a oedd yn llwyddiannus.

Gall pobl ifanc roi adborth i weithwyr ieuenctid a gwirfoddolwyr ar weithgareddau.

Caiff pobl ifanc eu hannog i gymryd rhan weithredol yn y gwaith o drefnu a chynnal gweithgareddau.

Gall eich sefydliad ddangos bod pobl ifanc yn cymryd rhan mewn cyfleoedd dysgu anffurfiol a heb fod yn ffurfiol.
   Mae gweithlu’r sefydliad yn ymgysylltu â phobl ifanc mewn cyfleoedd dysgu ffurfiol a rhai heb fod yn ffurfiol sy’n addysgiadol, yn rymusol, yn gyfranogol, yn gynhwysol ac yn fynegiannol, sy’n ymestyn eu gwybodaeth, eu sgiliau a’u dealltwriaeth.

 

Mae gan eich sefydliad ddealltwriaeth dda o ddogfen Egwyddorion a Dibenion Gwaith Ieuenctid yng Nghymru ac rydych yn defnyddio hon fel y sail i’ch gwaith o ddarparu cyfleoedd dysgu.

https://www.cwvys.org.uk/wp-content/uploads/2018/11/GWAITH-IEUENCTID-YNG-NGHYMRU-EGWYDDORION-A-DIBENION.png

Mae’ch sefydliad yn helpu pobl ifanc i fyfyrio ar y ffordd maen nhw wedi newid trwy eu hymwneud â’ch gweithgareddau a’ch prosiectau.
   Mae gweithlu’r sefydliad yn datblygu perthnasoedd cadarnhaol gyda phobl ifanc i gynorthwyo a hyrwyddo dysgu a chyflawniad pobl ifanc yn effeithiol. Mae gan eich sefydliad berthnasoedd cadarnhaol ac o ymddiriedaeth gyda phobl ifanc.

Mae'r bobl sy’n cyflawni gwaith gyda phobl ifanc yn defnyddio llawer o ffyrdd o feithrin ymddiriedaeth ac yn cynnig gweithgareddau a rhaglenni dysgu sy’n bleserus ac yn heriol.

Mae’ch sefydliad yn gwrando ar bobl ifanc er mwyn llunio rheolau sylfaenol a chodau ymddygiad
1.3 Dysgu a datblygiad pobl ifanc  Ar ôl ymwneud â darpariaeth gwaith ieuenctid y sefydliad, mae pobl ifanc yn datblygu gwybodaeth, sgiliau a dealltwriaeth ohonyn nhw eu hunain ac o’u dysgu.

 

Ar ôl iddyn nhw gymryd rhan yng ngweithgareddau’ch sefydliad gallwch ddangos bod pobl ifanc wedi dysgu sgiliau newydd ac wedi gwneud cynnydd personol a/neu gymdeithasol. Efallai y byddwch hefyd yn gallu dangos bod rhai pobl ifanc wedi gallu symud ymlaen i addysg, cyflogaeth neu hyfforddiant.

Gall pobl ifanc fyfyrio ar beth maen nhw wedi’i gyflawni a disgrifio beth maen nhw wedi’i ddysgu, a pha fudd maen nhw wedi’i gael.

Gall eich sefydliad gofnodi’r deilliannau hynny a restrir uchod a gallwch ddathlu cyflawniadau dysgu pobl ifanc.
   Ar ôl ymwneud â darpariaeth gwaith ieuenctid y sefydliad, mae pobl ifanc yn datblygu sgiliau personol, cymdeithasol ac emosiynol.

 

Mae sefydliadau gwaith ieuenctid yn wych am helpu pobl ifanc i ddatblygu eu sgiliau personol, cymdeithasol ac emosiynol. Mae'r adran hon yn gofyn ichi roi enghreifftiau o hyn, e.e.
Ar ôl ymwneud â’ch darpariaeth bydd pobl ifanc wedi datblygu sgiliau personol, cymdeithasol ac emosiynol. Byddwch yn gallu dangos bod pobl ifanc:

  • yn cyfathrebu’n dda
  • yn gweithio’n dda mewn grwpiau a thimau
  • yn sensitif ac yn llawn parch yn eu perthnasoedd.

Fel sefydliad efallai y byddwch yn gallu defnyddio astudiaethau achos i ddangos bod pobl ifanc wedi datblygu menter ac yn derbyn cyfrifoldeb am eu dewisiadau a’u gweithredoedd.
   Mae’r sefydliad yn galluogi pobl ifanc i helpu i lywio gweledigaeth a nodau’r sefydliad, ac yn ymwneud â’r gwaith o ddylunio, cynllunio a gwerthuso’r ddarpariaeth er mwyn ateb eu hanghenion. Mae’ch sefydliad yn cynnwys pobl ifanc wrth bennu targedau a phethau maen nhw eisiau eu cyflawni fel unigolion ac mewn grwpiau trwy ymwneud â’ch darpariaeth.

Mae'r bobl ifanc yn eich canolfan neu’ch prosiect yn cymryd rhan yn y gwaith o gynllunio, trefnu ac arwain rhaglenni a gweithgareddau, gyda chymorth gan weithwyr ieuenctid.

Mae’ch sefydliad yn cynnwys pobl ifanc wrth ystyried eu datblygiad a’u dysgu trwy’r prosiectau a gweithgareddau.
1.4 Gofynion cyfreithiol  Mae gan y sefydliad bolisïau, gweithdrefnau a chanllawiau perthnasol, a gall ateb ei ofynion cyfreithiol ac ymarfer diogel.

 Mae gan eich sefydliad bolisïau i sicrhau bod pobl ifanc a gwirfoddolwyr yn cael eu cadw’n ddiogel e.e. polisïau a gweithdrefnau iechyd a diogelwch, polisïau a phrosesau diogelu ac amddiffyn plant.
   Mae gan y sefydliad bolisïau a gweithdrefnau effeithiol ar gyfer diogelu ac iechyd a diogelwch pobl ifanc, staff a gwirfoddolwyr  Mae’ch sefydliad wedi bodloni’r gofynion cyfreithiol ar gyfer cadw pobl ifanc, staff a gwirfoddolwyr yn ddiogel e.e. polisi a gweithdrefnau gwirfoddolwyr, polisi ar weithio ar eich pen eich hun, asesiadau risg, proses cynefino.
   Mae gweithlu’r sefydliad yn deall ac mae wedi’i hyfforddi a’i baratoi i weithredu polisïau, gweithdrefnau a chanllawiau ar gyfer diogelu, iechyd a diogelwch, a gofynion cyfreithiol eraill.

 

Mae'r bobl sy’n gweithio gyda phobl ifanc yn gallu cael gafael ar y polisïau, gweithdrefnau a chanllawiau, eu deall a’u rhoi ar waith.

Mae pobl ifanc yn gwybod sut i wneud datgeliad diogelu a rhoi gwybod am fwlio neu unrhyw broblemau eraill.

Mae’ch sefydliad yn rhoi gwybod i bawb am y polisïau a gweithdrefnau ac unrhyw newidiadau pan gânt eu diweddaru.
   Mae’r sefydliad yn monitro ac yn adolygu ei bolisïau, ei weithdrefnau a’i ganllawiau yn rheolaidd, ac yn defnyddio canlyniadau’r prosesau hyn ar gyfer gwella a newid.  

Mae’ch sefydliad yn adolygu ac yn diweddaru’r polisïau a gweithdrefnau yn rheolaidd.

Mae'r bobl sy’n gweithio gyda phobl ifanc yn cael eu cynnwys yn y broses hon.

 TI helpu sefydliadau i gyflwyno eu hunanasesiad mae tri disgrifydd gradd i’w gwneud yn haws deall beth yw ymarfer da, ble mae angen rhagor o waith a ble mae angen llawer o waith. Yn y brif ddogfen disgrifir y rhain fel a ganlyn:

  • Ymarfer da,
  • Angen rhywfaint o ddatblygu, ac
  • Angen datblygu sylweddol.

I gyflawni’r Marc Ansawdd Gwaith Ieuenctid mae 5 cam.

Sut i ddechrau: camau 1-3.

I gael Lefel Efydd y Marc Ansawdd rhaid i sefydliad wneud y canlynol:

  1. Cysylltu â Chyngor y Gweithlu Addysg i gofnodi’ch diddordeb
  2. Cofrestru ar gyfer Ymwybyddiaeth o’r Marc Ansawdd ar-lein neu sut i gynnal hyfforddiant hunanasesu a/neu gael cymorth mentora os ydych chi’n teimlo y bydd hyn yn eich helpu. Mae mwy o wybodaeth am yr hyn sydd ar gael isod
  3. Cwblhau hunanasesiad sy’n cynnwys tystiolaeth o’r holl bethau da rydych chi’n eu gwneud (adroddiad ysgrifenedig yw hwn i ddangos sut yr ydych chi’n teimlo eich bod chi’n cyrraedd y Safon Ansawdd)C

    Beth sy'n digwydd nesaf: camau 4-5?

  4. Bydd CGA yn gwirio’r adroddiad ac unwaith y byddwch yn barod bydd yn trefnu i dîm asesu gynnal ymweliad Marc Ansawdd
  5. Bydd yn trefnu i’ch grŵp neu sefydliad gymryd rhan mewn cyfarfod (neu gyfres o gyfarfodydd) gyda gweithwyr ieuenctid eraill o sefydliadau yng Nghymru fel rhan o gyfarfod strwythuredig er mwyn gweld a yw’r sefydliad wedi dangos y cyrhaeddwyd gradd ‘ymarfer da’ ar gyfer pob dangosydd yn y lefel hon

Ar ôl ichi gwblhau’r 5 cam caiff adroddiad ei ysgrifennu i argymell i Lywodraeth Cymru y dylai ddyfarnu’r Marc Ansawdd. Mae’ch statws Marc Ansawdd yn ddilys am dair blynedd ac ar ôl hynny mae’n rhaid ei adnewyddu.

Mae cymorth, gwybodaeth a chyngor ar gael yn rhwydd ar bob un o’r camau hyn, hyd yn oed os mai dim ond eisiau gwybod ychydig mwy am y Marc Ansawdd cyn cymryd y cam cyntaf ydych chi.

Cymorth sydd ar gael gan Gyngor y Gweithlu Addysg

Mae Cyngor y Gweithlu Addysg yn annog sefydliadau gwaith ieuenctid yng Nghymru i ymgeisio ac mae’n gefnogol i sefydliadau newydd sy’n ymgeisio. Er mwyn helpu sefydliadau i ymgeisio a dysgu mwy am y Marc Ansawdd mae amrywiaeth o hyfforddiant ar gael, gan gynnwys:

  1. Hyfforddiant ar sut i gwblhau’r adroddiad hunanasesu a/neu fentor i gynorthwyo sefydliadau
  2. Cyfleoedd i gyflawni modiwl e-ddysgu y gellir ei ddefnyddio i wneud staff a gwirfoddolwyr yn gyfarwydd â’r Marc Ansawdd 
  3. Cymorth gan gymheiriaid oddi wrth ymgeiswyr blaenorol, a all roi awgrymiadau defnyddiol a chymorth a chyngor
  4. Cyfarfodydd gydag aseswyr er mwyn meithrin perthynas weithio gefnogol
  5. Rhoi adborth ar y ddogfen hunanasesu a chyngor ar gynnwys a strwythurau

Datblygiad pellach

Er mai nod y ddogfen hon yw helpu pobl i ymdrin â’r Lefel Efydd, ar ôl i hon gael ei chwblhau mae cyfle i sefydliadau gwblhau’r Lefelau Arian ac Aur os ydyn nhw’n dymuno gwneud hynny ac yn teimlo mai dyna’r peth iawn i’w sefydliad ei wneud. Mae cyrraedd y Lefel Efydd yn gyflawniad gwych ynddo ei hun a dylai sefydliadau fod yn falch o gyrraedd y safon ansawdd hon.

Lefel Arian: Mae gwaith ieuenctid yn gynhwysol, yn hygyrch ac yn cael ei gynnig gan staff sydd wedi’u hyfforddi.

Mae’r Lefel Arian yn cynnwys pedwar maes:

  1. Cynnwys pobl ifanc,
  2. Cwricwlwm,
  3. Cydraddoldeb ac Amrywiaeth, a
  4. Datblygu’r gweithlu.

Lefel Aur: Rheoli adnoddau i ateb anghenion pobl ifanc.

Mae'r Lefel Aur yn cynnwys pedwar maes:

  1. Cydnabod a dathlu cyflawniad,
  2. Gwybodaeth reoli,
  3. Partneriaethau, ac
  4. Adnoddau.

Geirfa termau

Term Ystyr

 

Safonau Ansawdd

 Bodloni’r meini prawf penodedig am yr hyn a ddisgwylir gan sefydliad gwaith ieuenctid. Mae pedair Safon Ansawdd i bob lefel.
Marc Ansawdd Dyfarniad i gydnabod cyrraedd safon benodedig.
Dangosyddion Dyma’r mesuriad mae angen ei gyflawni neu ei gynnal.
Disgrifyddion Gradd Mae'r rhain yn disgrifio pa mor dda mae sefydliad yn gwneud ar sail y meini prawf sydd wedi cael eu bodloni. Caiff y rhain eu rhannu fel a ganlyn: ymarfer da, angen rhywfaint o ddatblygiad, angen llawer o ddatblygiad.
Hunanasesiad Dyma lle y gall sefydliadau adolygu lle maen nhw a beth sydd ganddyn nhw ar waith ar hyn o bryd cyn yr asesiad. Gallan nhw nodi cryfderau a gwendidau a dathlu’r hyn sy’n mynd yn dda a pha mor dda yw’r ddarpariaeth gwaith ieuenctid. Gallan nhw hefyd ddangos beth yw barn pobl ifanc am y sefydliad.
Effaith Dyma’r gwahaniaeth mae hyn yn ei wneud i fywydau pobl ifanc o ganlyniad i’r rhaglenni gwaith ieuenctid.
Tystiolaeth Y dogfennau i gefnogi’r hyn y dywedwch eich bod yn ei wneud. Gallai hyn gynnwys polisïau, adroddiadau, posteri ac ati
Dysgu anffurfiol Dysgu sy’n deillio o weithgareddau pob dydd sy’n gysylltiedig â’r gwaith, teulu neu hamdden. Nid yw wedi’i drefnu. Yn y rhan fwyaf o achosion mae dysgu anffurfiol yn anfwriadol o safbwynt y dysgwr e.e. dysgu o brofiad, ennill sgil ar ôl hyfforddiant chwaraeon
Dysgu heb fod yn ffurfiol Mae dysgu heb fod yn ffurfiol yn cyfeirio at addysg sy’n digwydd y tu allan i’r system ysgol ffurfiol e.e. mynd i grŵp Sgowtiaid neu yn ystod gweithgaredd mewn clwb ieuenctid
Rheoli perfformiad Dull cynlluniedig a rheolaidd o helpu sefydliad i gyflawni ei nodau a’i amcanion trwy fonitro a gwella perfformiad unigolion, a’r sefydliad yn gyfan
Llywodraethiant  Llywodraethiant yw’r term am y ffordd mae grŵp o bobl fel grŵp o ymddiriedolwyr neu fwrdd llywodraethwyr neu gyngor yn gwneud pethau. Mae llawer o grwpiau yn creu pwyllgor i benderfynu sut mae pethau i fod i gael eu gwneud. Hefyd llywodraethiant yw’r ffordd mae’r gwaith o wneud penderfyniadau yn effeithio ar bobl yn y sefydliad hwnnw.

Er mwyn cyflawni’r canlyniadau gorau i bobl ifanc, mae’n bwysig i bob sefydliad ddarparu’r gwasanaeth gorau posibl a bod mewn sefyllfa i ddangos canlyniadau cadarnhaol ei waith. Er y byddwch chi’n gwybod pa effaith rydych yn ei chael, dylech chi fod yn gallu dangos hynny i eraill sy’n llai cyfarwydd â’ch gwaith. Mae cynnal hunan-fyfyriad rheolaidd yn ganolog i helpu i roi dealltwriaeth well i bobl am yr hyn rydych yn ei wneud, ac o’ch gwerth – adolygu eich gwasanaethau, edrych ar yr hyn y gallwch ei wella neu newid er mwyn gwella ansawdd ac effaith eich cyflwyniad.

Yn ei hanfod, dyma ystyr ymarfer ac ansawdd da - gwybod yr hyn rydych yn ei wneud, dysgu wrtho a’i wneud yn well. Y rhain yw’r prif elfennau o ran eich helpu chi i ddatblygu llwybr at welliant parhaus a datblygu gwasanaeth sy’n diwallu anghenion y bobl ifanc yr ydych chi’n gweithio gyda nhw.

 Lawrlwythwch y canllaw.

Quality Mark Logo All 3 Levels

Sefydliad: YMCA Abertawe

Darpariaeth: Bwrdd Gofalwyr Ifanc

Person Cyswllt: Egija Cinovska

 

 

 

Mae’r Bwrdd Gofalwyr Ifanc yn grŵp o ofalwyr ifanc sy’n gweithio gyda’r YMCA ar bob lefel, arianwyr a gwneuthurwyr polisi, i helpu i siapio’r Gwasanaeth Gofalwyr Ifanc yn Abertawe.

Mae Gwasanaeth Gofalwyr Ifanc YMCA Abertawe yn cynnal ymgynghoriadau rheolaidd gyda phobl ifanc er mwyn sicrhau bod y gwasanaethau a ddarperir wedi’u siapio ganddyn nhw a’u bod yn diwallu eu hanghenion mewn modd priodol.
Trwy’r adborth a gasglwyd, mae’r gofalwyr ifanc wedi dweud y byddai bod â phlatfform penodol i gyflawni’r tasgau hyn yn fuddiol.

Rhannodd YMCA Abertawe y syniad gyda’r gofalwyr ifanc a’u hannog i gynnig eu hunain os oedden nhw eisiau bod yn aelod o Fwrdd Gofalwyr Ifanc YMCA Abertawe.

Gwnaeth nifer fawr o bobl ifanc geisiadau am y cyfle. Os cawsant eu rhoi ar y rhestr fer ar gyfer y cam cyfweld, bu’n rhaid i’r bobl ifanc lunio cyflwyniadau ar eu syniadau oedd yn canolbwyntio ar nifer fawr o wahanol bynciau. Cymerasant ran mewn cyfweliadau hwyliog a chafodd y bobl ifanc eu sgorio ar eu brwdfrydedd a’u hymroddiad i gynrychioli eu cymuned.

Mae'r gofalwyr ifanc yn cwrdd bob mis i roi syniadau ynghyd ynghylch sut i siapio’r gwasanaeth, trafod anghenion gofalwyr ifanc a pha gymorth y dylid ei ychwanegu a/neu ei newid er mwyn eu cynorthwyo. Mae’r gofalwyr ifanc yn cymryd rhan mewn gweithdai cynllunio, teithiau a gweithgareddau i YMCA Abertawe yn ogystal â gweithio gyda sefydliadau allanol fel arianwyr ac ysgolion i gynorthwyo gofalwyr ifanc mewn gwahanol leoliadau.

Mae'r Bwrdd Gofalwyr Ifanc yn cwrdd unwaith y mis wyneb yn wyneb, yn ogystal ag ymgysylltu â’i gilydd yn rheolaidd trwy Grŵp Facebook penodol i’r Bwrdd Gofalwyr Ifanc.

Yn ymuno â’r grŵp bob mis mae gweithwyr proffesiynol a gwneuthurwyr polisi allweddol sy’n gweithio gyda’r grŵp i helpu i ysgrifennu Strategaeth Gofalwyr i Abertawe.

Mae'r Bwrdd Gofalwyr Ifanc wedi cyflawni nifer fawr o brosiectau dros y chwe mis diwethaf ac mae’r Grŵp Facebook yn profi’n eithaf defnyddiol iddyn nhw roi diweddariadau i’w gilydd ynghylch pa dasgau, rolau a chyfrifoldebau maen nhw wedi’u cyflawni. Mae hefyd yn galluogi cyfarfodydd wyneb yn wyneb i fod yn fwy cynhyrchiol wrth ganolbwyntio ar lunio cynlluniau a chamau gweithredu newydd.

Mae’r gwersi allweddol a ddysgwyd yn cynnwys hygyrchedd y sesiynau misol. I ddechrau roedd y grŵp wedi bwriadu cwrdd wyneb yn wyneb yn YMCA Abertawe i gymryd rhan yn y cyfarfodydd. Fodd bynnag, oherwydd y cyfyngiadau yn sgil y pandemig ac argaeledd gofalwyr ifanc, penderfynodd y grŵp ddarparu mynediad cyfunol i gymryd rhan yn y sesiynau. Gall gofalwyr ifanc gymryd rhan wyneb yn wyneb neu ar lein.

Gwers arall a ddysgwyd oedd ymestyn amser y cyfarfodydd misol. Yn wreiddiol roedd y gofalwyr ifanc wedi cytuno i gwrdd am awr, ond oherwydd y trafodaethau manwl yr oedd y bobl ifanc yn eu cael, cytunwyd bod angen ymestyn hyd y sesiynau.
Mae'r gofalwyr ifanc hefyd wedi awgrymu sesiwn breswyl neu ddiwrnodau cwrdd i ffwrdd blynyddol/chwe-misol gyda’r grwpiau i roi cyfleoedd iddynt feithrin gwell perthnasoedd rhwng aelodau’r grwpiau, gweithio ar sgiliau meithrin tîm a bod â mwy o amser i gynllunio’r gwasanaeth at y dyfodol.

Mae Bwrdd Gofalwyr Ifanc YMCA Abertawe yn rhoi cyfle i ofalwyr ifanc siapio’r gwasanaeth, bod â llais ar y gwasanaethau sydd o fudd uniongyrchol iddynt, a chynrychioli eu cymheiriaid, gan sicrhau y clywir lleisiau’r holl ofalwyr ifanc.

Mae'r gofalwyr ifanc yn cymryd rhan mewn siapio’r gwasanaeth a chynllunio gweithdai a gweithgareddau ar gyfer yr holl brosiectau yn y gwasanaeth gofalwyr ifanc. Mae'r gofalwyr ifanc hefyd yn cael y cyfle i gwrdd â’r arianwyr yn uniongyrchol er mwyn rhoi adborth ar yr hyn sydd wedi gweithio a pha gymorth a fyddai o fudd iddynt yn y dyfodol.

Mae'r gofalwyr ifanc wedi gweithio mewn partneriaeth â gwneuthurwyr polisi lleol allweddol er mwyn cymryd rhan yn y gwaith o siapio Strategaeth Gofalwyr Awdurdod Lleol Abertawe. Mae hwn wedi bod yn gyfle gwych i’r gofalwyr ifanc siapio’r gwasanaethau yn y dyfodol i’r holl ofalwyr ifanc yn Abertawe. Maen nhw hefyd wedi cymryd rhan mewn sgyrsiau gyda bwrdd Partneriaeth Gorllewin Morgannwg ac yn teimlo eu bod bellach yn cael y gydnabyddiaeth maen nhw’n ei haeddu.

Mae'r gofalwyr ifanc wedi gallu cymryd rhan mewn gwahanol gyfleoedd hyfforddi er mwyn datblygu eu sgiliau tra buont yn aelodau o’r bwrdd. Mae hyn wedi cynnwys hyfforddiant achrededig gan Agored Cymru mewn Deall Ymwybyddiaeth Gofalwyr Ifanc, Cymorth Cyntaf a Gwneud Ffilmiau.

Mae'r gofalwyr ifanc wedi dysgu sgiliau gan gynnwys cymryd rhan mewn gweithgareddau i godi ymwybyddiaeth o ofalwyr ifanc yn eu cymunedau, recordio podlediadau, ffilmio fideos, cymryd rhan yn y gwaith o ddarparu gwersi ABCh mewn ysgolion, a sefydlu clybiau amser cinio.

Mae YMCA Abertawe wedi cael llawer o fuddion o weithio gyda'r Bwrdd Gofalwyr Ifanc. Mae'n caniatáu inni gael y wybodaeth ddiweddaraf am anghenion y grŵp. Mae gweithio mewn partneriaeth gyda’r bobl ifanc wedi golygu bod ganddyn nhw berchnogaeth lwyr ar y ffordd y caiff eu gwasanaethau eu datblygu.

Mae'r bobl ifanc wedi gallu ein helpu i gynllunio a darparu gwasanaeth penwythnos pwrpasol, gwaith preswyl, podlediadau a digwyddiadau sy’n helpu i godi ymwybyddiaeth am ofalwyr ifanc.

Mae'r staff wedi teimlo bod ganddyn nhw fwy o ddealltwriaeth o’r ffordd mae’r gofalwyr ifanc yn teimlo am y gwasanaeth a beth yw eu dyheadau at y dyfodol. Pan mae’r staff yn mynd i gyfarfodydd i ddadlau ar ran gofalwyr ifanc, maen nhw’n teimlo y gallan nhw gynrychioli lleisiau’r bobl ifanc yn wirioneddol.

Mae aelodau Bwrdd Gofalwyr Ifanc YMCA Abertawe yn cynnal trafodaethau rheolaidd i sicrhau bod y gwasanaeth yn cynnig darpariaeth gynhwysol er mwyn i ofalwyr ifanc fanteisio ar y gwasanaeth.

Un o’r prif bynciau mae’r bobl ifanc yn ei godi yw problem trafnidiaeth er mwyn i ofalwyr ifanc fynd i weithgareddau wyneb yn wyneb. Gall trafnidiaeth fod yn rhwystr enfawr. Mae YMCA Abertawe yn darparu trafnidiaeth i’r holl ofalwyr ifanc er mwyn sicrhau eu bod nhw a’u teuluoedd yn gallu manteisio ar y gwasanaeth.

Mae aelodau’r Bwrdd Gofalwyr Ifanc yn cydnabod pwysigrwydd dathlu’r Gymraeg a diwylliant Cymru. O’r herwydd mae YMCA Abertawe wedi creu cynnwys i godi ymwybyddiaeth o ofalwyr ifanc yn Gymraeg ac yn Saesneg.

Ar hyn o bryd mae Bwrdd Gofalwyr Ifanc YMCA Abertawe yn ei flwyddyn gyntaf. Ar sail yr adborth a roddwyd gan ofalwyr ifanc, mae’r bwrdd wedi cael effaith gadarnhaol ar ofalwyr ifanc yn uniongyrchol ac wedi darparu gwasanaeth o ansawdd da i aelodau’r gwasanaeth.

Mae'r bwrdd wedi bod yn llwyddiannus ac wedi cael effaith wirioneddol ar y ffordd mae pethau’n cael eu datblygu i ofalwyr ifanc o’r cychwyn cyntaf. Mae Bwrdd Gofalwyr Ifanc YMCA Abertawe yn gobeithio parhau â’i waith a thyfu er mwyn sicrhau y bydd gofalwyr ifanc yn cael eu hadnabod a’u cydnabod ac yn cael y gwasanaeth maen nhw’n ei haeddu.

 I am a Young Carer - YouTube

YMCA Young Carers - YouTube

Ffrydio cerddoriaeth Everyday Young Carers | Gwrando ar ganeuon, albymau, rhestrau chwarae yn rhad ac am ddim ar SoundCloud

youngcarers1   youngcarers2

youngcarerslogo

Quality Mark Logo All 3 Levels

Sefydliad: Gwasanaeth Ieuenctid Torfaen

Darpariaeth: Partneriaeth Torfaen Hwb Gwasanaeth Ieuenctid Torfaen

Person Cyswllt: David Williams

 

 

 

 

Nod: Cydweithredu gyda’r gorau yn y sector statudol a’r trydydd sector i ddarparu cyfleoedd gwaith ieuenctid i bobl ifanc mewn ardal ynysig sy’n wynebu amddifadedd economaidd yn Nhorfaen.

Ein rhanddeiliaid: Mae'r bobl ifanc yn ganolog i’r gwaith o gynllunio a datblygu’r prosiect ac mae gan bob agwedd ar y prosiect grwpiau o bobl ifanc yn gwirfoddoli ac yn llywio a chynllunio’r ddarpariaeth. Mae hyn yn cynnwys:

Clwb ieuenctid mynediad agored – mae’r bobl ifanc yn cynllunio’r rhaglen gyflenwi, yn cynllunio meini prawf y sesiynau ac yn gosod paramedrau fel noson iau a noson hŷn. Mae'r bobl ifanc yn cynllunio rhaglenni haf a gwyliau. Mae'r bobl ifanc yn cyfrannu at anghenion y gymuned.

Maen nhw hefyd yn cyfrannu at y gwaith o ddatblygu prosiectau a darpariaeth, fel:

Prosiectau –

  • Mae aelodau hŷn a phobl ifanc sy’n brentisiaid yn helpu i siapio cynigion a rhaglenni gwaith sydd wedi arwain at ddarparwyr hyfforddiant yn cynnig rhaglenni pwrpasol i bobl ifanc.
  • Grwpiau ieuenctid penodol i bobl ifanc sy’n profi gofal.
  • Rhaglen llysgenhadon ieuenctid i annog gwirfoddolwyr i ddathlu’r safle treftadaeth y byd lle maen nhw’n byw.
  • Mae'r bobl ifanc wedi cynllunio a chyflwyno cais am gyllid ar gyfer prosiect iechyd meddwl ffotograffiaeth greadigol.
  • Mae'r bobl ifanc wedi arwain a chynllunio rhaglen (mewn partneriaeth â Bwrdd Iechyd Prifysgol Aneurin Bevan) i gynorthwyo’r bobl ifanc â diabetes i bontio o’r gwasanaeth plant i’r gwasanaeth oedolion.
  • Mae'r bobl ifanc wedi dechrau ac arwain (mewn partneriaeth â Greggs) raglen rhannu bwyd sy’n cynorthwyo teuluoedd sy’n wynebu caledi ariannol.

Mae gan Dorfaen un o’r poblogaethau mwyaf o bobl ifanc sydd wedi profi gofal yng Nghymru. Mewn ymateb i hyn sefydlwyd grŵp plant sy’n derbyn gofal (Care Busters) mewn ymgynghoriad â phobl ifanc, ac mae’n darparu amrywiaeth o gymorth a gweithgareddau.

Cyfranogol a Grymusol – aeth nifer o bobl ifanc a ddechreuodd trwy fynychu’r ddarpariaeth ieuenctid ymlaen i fod yn aelodau hŷn, wedyn yn brentisiaid a nawr maen nhw’n cael eu cyflogi llawn amser gan y gwasanaeth ieuenctid a’r Hwb. Maen nhw i gyd yn gweithio tuag at gael gradd mewn gwaith ieuenctid. Mae llawer o'r bobl ifanc hyn bellach yn arwain y ddarpariaeth yn yr ardal a thrwy’r prosiect. Mae'r grŵp Llysgenhadon Ieuenctid yn dylanwadu ar sector cenedlaethol treftadaeth y byd fel enghraifft flaenllaw o sut i ennyn diddordeb pobl ifanc mewn safleoedd treftadaeth y byd.

Mynegiannol a Chynhwysol – mae’r amrywiaeth o wasanaethau sydd ar gael yn darparu ar gyfer amrywiaeth fawr o anghenion cymunedol; cymorth â chyflogaeth ôl-16, prosiect rhieni ifanc, darpariaeth mynediad agored, chwaraeon iechyd meddwl a rhaglenni llesiant a chymorth i bobl ifanc ag anableddau ac ati. Mae'r cwbl yn bosibl oherwydd yr hyblygrwydd wrth ymateb i anghenion o ganlyniad i’r bartneriaeth rhwng y sector statudol a’r trydydd sector.

Addysgiadol – mae’r bartneriaeth yn cynnig amrywiaeth o brofiadau addysgiadol trwy brosiect cyfnewidiadau â safleoedd treftadaeth byd eraill, meithrin sgiliau cymdeithasol ac annibyniaeth trwy waith ôl-16, clwb ieuenctid, cyfleoedd gwirfoddoli. Mae'r ddarpariaeth hefyd yn cynnal gwaith mewn ysgolion i bobl ifanc feithrin amrywiaeth o sgiliau emosiynol a chymdeithasol mewn lleoliadau gwaith ieuenctid gyda gweithwyr ieuenctid cymwysedig.

Daeth y prosiect i fod oherwydd angen a nodwyd gan bobl ifanc o ganlyniad i fyw mewn cymuned ynysig. O’r herwydd partnerodd Gwasanaeth Ieuenctid Torfaen gyda Hwb Torfaen i wneud y mwyaf o’r adnoddau ffisegol oedd gan y gwasanaeth ieuenctid (adeiladau, cerbydau ac ati) a gallu hyblyg yr Hwb i fanteisio ar adnoddau eraill (cynigion, prosiectau cenedlaethol ac ati). O ganlyniad cafodd gweithgareddau ieuenctid eu cyfuno mewn rhai achosion ac mewn achosion eraill eu cydgysylltu ac yn hytrach na bod angen i’r bobl ifanc oresgyn rhwystrau cysylltiedig ag ynysigrwydd, daethpwyd â’r ddarpariaeth a’r adnoddau atyn nhw.

Trwy werthuso a chyfranogiad parhaus, sy’n ganolog i’r holl weithgarwch, mae’r bobl ifanc wedi adnabod a chynllunio yn barhaus raglenni sydd wedi achosi i werth £500,000 o adnoddau fynd i mewn i weithgareddau ac adnoddau gwaith ieuenctid yn y pum mlynedd ddiwethaf.

Trwy gyfnod y pandemig COVID mae’r bobl ifanc sy’n cael trafferth gydag ynysigrwydd a diffyg cyfleusterau clwb ieuenctid wedi cydgynllunio rhaglen i feithrin eu sgiliau ffotograffiaeth trwy fynd allan i’r awyr agored a darlunio’r natur a’r harddwch o’u cwmpas. Trwy hyn gallai gweithwyr ieuenctid gynorthwyo â’u problemau iechyd emosiynol ac iechyd meddwl.

Yn ddiweddar nododd y bobl ifanc bod yr angen am fan diogel, derbyngar ac ag adnoddau da yn flaenoriaeth iddynt. O’r herwydd mae gwerth £200,000 o gyllid wedi cael ei sicrhau i adnewyddu’r ganolfan ieuenctid. Dim ond oherwydd natur unigryw’r bartneriaeth yr oedd hyn yn bosibl.

Mae'r bobl ifanc wedi elwa ar y bartneriaeth hon mewn nifer o ffyrdd.

Yn bersonol – mae pobl ifanc 11-25 oed wedi cael mwy o fynediad at weithwyr ieuenctid proffesiynol i’w cynorthwyo gydag amrywiaeth o faterion personol. Mae'r bobl ifanc wedi cael man diogel mynediad agored i wneud ffrindiau, cwrdd â phobl ifanc newydd a meithrin eu golwg ar y byd a safbwynt moesol/moesegol ar amrywiaeth o ffactorau. Mae'r bobl ifanc wedi gallu cael cymorth penodol mewn cysylltiad â’u hamgylchiadau personol fel cymorth gyda hyfforddiant a chyflogaeth, gwirfoddoli a datblygiad gyrfa, a chymorth i oresgyn rhwystrau ariannol.

Yn gymdeithasol – mae’r bobl ifanc wedi cyfrannu at fentrau ar draws y gymuned i hybu gwaith pontio’r cenedlaethau, mynd i’r afael â stereoteipiau negyddol o bobl ifanc a chymryd rhan mewn gweithgareddau sy’n hybu eu hamgylchedd. Mae'r bobl ifanc wedi cael profiadau preswyl, wedi rhoi cynnig ar weithgareddau grŵp newydd ac wedi meithrin eu sgiliau cymdeithasol.

Yn addysgol – mae’r bobl ifanc sy’n manteisio ar y ddarpariaeth yn gallu meithrin amrywiaeth o sgiliau, o sgiliau byw sylfaenol mewn lleoliad clwb ieuenctid fel coginio pryd o fwyd i leoliad lefel gradd a chymorth goruchwyliaeth a DPP parhaus fel aelodau cyflogedig o’r staff.

Y gymuned – mae’r bobl ifanc wedi hyrwyddo statws safle treftadaeth y byd y gymuned trwy ddod yn llysgenhadon ieuenctid hyfforddedig. Mae'r bobl ifanc yn cyfrannu ar gynghorau cymuned a gweithgorau cymunedol, yn eistedd arnyn nhw ac yn rhoi cyflwyniadau iddyn nhw. Mae'r bobl ifanc yn cynllunio ac yn arwain gweithgareddau bob blwyddyn mewn digwyddiadau fel Diwrnod Treftadaeth y Byd ac wedi meithrin cysylltiadau gyda chartrefi gofal lleol er mwyn hybu gwaith pontio’r cenedlaethau.

Staff - mae cyfleoedd cyflogaeth i’r staff wedi cael eu cynnig trwy’r prosiect. Mae'r staff wedi gallu gweithio ar brosiectau partneriaethol amlasiantaethol trwy’r ddarpariaeth. Mae'r staff wedi gallu meithrin sgiliau llunio cynigion, sgiliau arweinyddiaeth a sgiliau rheoli prosiect trwy’r prosiect.

Gwirfoddolwyr – mewn modd tebyg i’r staff a chan gynnwys cyfleoedd i ddatblygu eu gwybodaeth o waith ieuenctid, amrywiaeth a gwahaniaeth yn y sector a’r cryfderau mae pob un yn dod â nhw. Y cyfle i gymryd rhan yn y ddarpariaeth leol trwy Hwb a hefyd darpariaeth ledled Torfaen trwy’r gwasanaeth ieuenctid a’i bartneriaid.

Ceisir cael gwybod beth yw anghenion, rhwystrau a disgwyliadau unigol pobl ifanc trwy waith parhaus i feithrin perthnasoedd, ymgynghori a meithrin cysylltiadau cymunedol. Trwy hynny gellir canfod anghenion a rhwystrau a chynnig rhaglenni cymorth i gynorthwyo â chymryd rhan mewn gweithgareddau ieuenctid. Lle bo’n berthnasol mae cymorth pwrpasol wedi cael ei ddatblygu i bobl ifanc, mae cymorth pontio a darpariaeth gynhwysol wedi cael eu datblygu, yn ogystal â chymorth i fanteisio ar wasanaethau mynediad agored.

Aethpwyd i’r afael â rhwystrau ariannol trwy sicrhau cyllid a defnyddio adnoddau a rennir yn dda. Caiff y defnydd o’r Gymraeg ei hybu wrth i weithwyr ieuenctid sy’n siarad Cymraeg gymryd rhan yn y gwaith o ddarparu gwasanaethau.

Mae rhwystrau cymdeithasol ac economaidd wedi cael eu lleihau trwy ddarparu trafnidiaeth a gweithio mewn partneriaeth â darparwyr hyfforddiant i ddod â’r gwasanaeth at y bobl ifanc yn yr ardal ac mae cyfleoedd i gymryd rhan mewn gweithgareddau newydd wedi cynyddu.

Erbyn hyn mae’r bartneriaeth yn agwedd ar y Gwasanaeth Ieuenctid a’r Hwb sy’n cael ei hariannu’n ganolog a thrwy grant. Mae rhaglenni hyfforddiant, dyletswyddau iechyd a diogelwch a rheoli llinell a goruchwyliaeth staff i gyd yn cael eu rhannu ar draws y ddarpariaeth. Gwnaeth yr Hwb gais llwyddiannus i reoli canolfan gymunedol fwy yn rhan ddeheuol Torfaen ac o’r herwydd mae cronfa ehangach o adnoddau ac arbenigedd i sicrhau parhad gwasanaethau i’r bobl ifanc yn yr ardal.

Tudalennau ar y cyfryngau cymdeithasol FB/Insta/Twitter

@torfaenyouth https://twitter.com/torfaenyouth
@HwbTorfaen https://twitter.com/hwbtorfaen

 

Quality Mark Logo All 3 Levels

Sefydliad: Gwasanaeth Ieuenctid Torfaen

Darpariaeth: Llyfrau lloffion

Person Cyswllt: Helen Cooling

 

 

 

 Nodau’r cysyniad

  • Dangos tystiolaeth o weithgareddau a chyflawniadau’r bobl ifanc.
  • Cofnodi a monitro gweithgareddau, gan gynnwys adborth oddi wrth y bobl ifanc.

Defnyddir y llyfrau lloffion fel canllaw i aelodau newydd o’r clwb er mwyn arddangos pa weithgareddau a gynhelir a beth mae’r bobl ifanc yn ei ddweud amdanyn nhw.

Maen nhw hefyd yn darparu offeryn ymarfer myfyriol a ffordd o werthuso’r ddarpariaeth i’r staff ac i’r bobl ifanc.

Caiff y llyfrau lloffion eu dylunio, eu perchnogi a’u creu gan y bobl ifanc ar y ddarpariaeth fel adlewyrchiad o’u perchnogaeth ar y ddarpariaeth.

Bob wythnos mae tystiolaeth o’r gweithgareddau a gynhaliwyd, fel lluniau, gwerthusiadau, cynnyrch gwaith, taflenni adborth ac ati yn cael eu casglu, ac yna’n cael eu rhoi yn y llyfrau lloffion gan y bobl ifanc dros yr wythnosau nesaf.

Caiff y lluniau eu hargraffu a’u hychwanegu at y llyfrau lloffion gan y bobl ifanc a’r staff. Gofynnir i’r bobl ifanc beth oedden nhw wedi’i fwynhau/heb ei fwynhau a chaiff yr adborth hwn ei ychwanegu hefyd.

Wrth i’r llyfrau lloffion gael eu llenwi gyda thystiolaeth ar ffurf ffotograffau, lluniau a sylwadau, rydym yn gofyn i’r bobl ifanc gynllunio sut i gyflwyno’r dudalen, beth i’w ychwanegu a sut i gynllunio ar gyfer y sesiwn nesaf.

Fel arfer mae’r bobl ifanc eisiau edrych yn ôl arnyn nhw eu hunain a’u cyfoedion o weithgareddau blaenorol. Bydd y bobl ifanc yn aml yn dweud faint oedden nhw wedi mwynhau rhywbeth, a chaiff hyn ei fwydo’n ôl yn ystod gweithgarwch myfyrio a’i ychwanegu at y gwaith cynllunio.

Mae gweithgareddau llyfrau lloffion yn ffordd wych inni gynllunio a myfyrio gyda’r bobl ifanc. Maen nhw’n cael cyfle i fod yn greadigol a chyflwyno eu clwb nhw ym mha bynnag ffordd maen nhw’n dewis.

Rydym yn annog creadigrwydd a gwerthuso gyda’r bobl ifanc a bydd y llyfrau lloffion yn adlewyrchu hyn.

Bydd ar rai grwpiau o bobl ifanc sy’n cymryd rhan yn y gwaith o gwblhau ein llyfrau lloffion angen llawer o gymorth yn ystod y sesiwn, ond lle bo’n bosibl rydym yn rhoi cyfleoedd i fod yn annibynnol a gwneud penderfyniadau i’r rhai sy’n teimlo eu bod nhw eisiau hynny.

Mae llyfrau lloffion yn arwydd da i’r staff eu bod yn diwallu holl anghenion yr holl bobl ifanc. Mae'r bobl ifanc yn aml yn falch iawn wrth edrych yn ôl ar eu cyflawniadau a gweld pa mor dda mae eu clwb yn gwneud a beth sydd ar gael iddyn nhw os ydyn nhw’n dewis cymryd rhan.

Mae llyfrau lloffion yn offeryn myfyriol a gwerthusol parhaus, felly mae effeithiau dysgu yn cael eu cymhwyso bron ar unwaith. Wrth werthuso’r gweithgareddau gan ddefnyddio’r llyfr lloffion, ceir adborth ynghylch pa mor effeithiol yw’r gweithgaredd, sut oedd y lefelau ymgysylltu, beth ellid ei wella a beth ellid ei wneud yn well y tro nesaf.

Dros gyfnod hirach, rhoddodd y llyfrau lloffion hanes hirach o weithgareddau fel bod pobl ifanc sy’n aelodau newydd ac aelodau newydd o'r staff yn deall beth sydd wedi bod yn digwydd ynghynt. Mae hyn yn golygu y gall pawb ddysgu o unrhyw feysydd i’w gwella, stori’r ddarpariaeth a beth sydd wedi profi’n effeithiol ac wedi cael derbyniad da, a hefyd beth na chafodd dderbyniad cystal.
Er enghraifft, os nad oes llawer yn cymryd rhan yn y gweithgaredd rydym yn gwerthuso a gafodd y gweithgaredd ei anelu at y grŵp iawn, ar yr adeg iawn yn ystod y noson ac ati.

Mae'r bobl ifanc yn gallu gwerthuso a lleisio barn ynghylch sut i gyflwyno eu ffotograffau a gwerthusiadau o’u gweithgareddau. Mae hyn yn rhoi ymdeimlad o berthyn i’r clwb iddyn nhw, ac ymdeimlad ehangach o gymuned.

Mae’n eu galluogi i fod yn greadigol ac arddangos eu talent artistig. Mae’n galluogi pob person ifanc i gyfrannu i’r graddau mae’n dymuno ac yn gallu gwneud. Mae’n helpu’r bobl ifanc i ddathlu eu rôl yn y ddarpariaeth ac yn y gymuned ehangach ac yn cydnabod eu llwyddiannau.

Mae llyfrau lloffion yn rhoi ymdeimlad o gyflawniad i’r bobl ifanc ac yn atgyfnerthu llesiant. Mae edrych yn ôl trwy sesiynau hŷn yn arddangos dysgu ac yn pwysleisio eu datblygiad a’r cynnydd maen nhw wedi ei wneud trwy’r clwb.

Mae'r llyfrau lloffion yn atgyfnerthu perthnasoedd rhwng ffrindiau, yn rhoi ymdeimlad o gydlyniant y grŵp a phrofiad a rennir trwy alluogi myfyrio, taith bersonol, magu hyder a meithrin sgiliau.

Mae'r llyfrau lloffion yn cyfrannu at greu man diogel i fynd i’r afael â thrafodaethau anodd mewn ffordd gynhwysol a chadarnhaol.

Oherwydd bod y llyfrau lloffion yn broses gwerthuso a myfyrio barhaus (ac yn cael eu cadw fel copïau caled ar y safle) maen nhw’n offer allweddol i gynllunio gweithgareddau at y dyfodol yn effeithiol. Gall y staff gael dealltwriaeth yn gyflym am y bobl ifanc a natur y ddarpariaeth a’r hyn sydd wedi bod yn effeithiol o’r blaen.

Mae'r llyfrau lloffion yn ffordd wych o greu cyfleoedd a man diogel ar gyfer trafodaethau. Gall y staff a’r bobl ifanc fyfyrio ar weithdai ar faterion o bwys, er enghraifft, neu siarad am gyfnod anodd pan roedd y ddarpariaeth wedi wynebu heriau.

Maen nhw hefyd yn cynnig cyfle gwych i greu trafodaeth un i un ynghylch amrywiaeth o faterion. Gall y bobl ifanc fod yn hyderus bod yr hyn maen nhw’n ei weld ac yn ei deimlo’n iawn a bod llawer o bobl ifanc sydd wedi bod yno o’u blaen wedi profi pethau tebyg. Maen nhw’n helpu i gyfrannu at ymdeimlad o ddiogelwch a chymuned.

Mae'r llyfrau lloffion yn ffordd wych o’n hatgoffa beth rydyn ni wedi’i wneud ac yn arddangos y clwb yn ei holl ogoniant. Mae'n cynhesu’r galon i allu edrych yn ôl ar yr effaith mae’r ddarpariaeth wedi’i chael ar y bobl ifanc, y staff a’r gwirfoddolwyr.

Dyma’r hyn rydyn ni’n ei wneud, dyma sut rydyn ni’n ei wneud,

Dyma’r hyn mae’r bobl ifanc yn ei feddwl ohono

Mae'r llyfrau lloffion ynddynt eu hunain yn adlewyrchiad o’r bobl ifanc sy’n mynychu’r ddarpariaeth ac yn cael eu siapio gan y bobl ifanc fel adlewyrchiad o’u hanghenion, eu diddordebau a’u dyheadau. Yn y clwb ieuenctid LGBTQ+, mae’r llyfrau lloffion yn cyflwyno materion o bwys a gweithgareddau sy’n cynorthwyo’r bobl ifanc i ymchwilio a mynegi eu hunain mewn amgylchedd diogel. Mae’r llyfrau lloffion gofalwyr ifanc yn helpu’r bobl ifanc i ddangos sut mae’r ddarpariaeth ieuenctid yn brwydro yn erbyn problemau ynysigrwydd.

Mae digwyddiadau a gweithgareddau sydd â’r nod o hybu amrywiaeth a chynwysoldeb yn cael eu hadlewyrchu yn y llyfrau lloffion, fel gweithgareddau Dydd Gŵyl Dewi, digwyddiadau ymwybyddiaeth o hiliaeth ac ati.

Mae ar y bobl ifanc angen gwahanol lefelau o gymorth i gymryd rhan yn y broses llyfrau lloffion. Felly mae’r staff yn ymateb yn unol â hynny, ac felly’n sicrhau eu bod yn adlewyrchiad cywir o’r amrywiaeth o weithgarwch cynhwysol sy’n cael ei gynnig ar draws y gwasanaeth cyfan.

Mae'r llyfrau lloffion yn brosiectau parhaus ac yn dal i ddatblygu bob wythnos. Mae gan rai darpariaethau nifer o rifynnau o’u llyfrau lloffion eisoes. Mae'r llyfrau lloffion yn edrych yn wahanol gan ddibynnu ar natur y ddarpariaeth. Mae rhai ar ffurf dyddlyfrau, mae rhai wedi’u seilio ar ffotograffau ac mae rhai wedi’u seilio ar weithgareddau, i gyd mewn ymateb i’r bobl ifanc a sut maen nhw eisiau iddyn nhw edrych.

Mae'r llyfrau lloffion yn gopïau caled sy’n cael eu cadw yn y lleoliad.

Tudalennau ar y cyfryngau cymdeithasol FB/Insta/Twitter

@torfaenyouth https://twitter.com/torfaenyouth
https://www.instagram.com/torfaenyouth/
Cyngor Bwrdeistref Sirol Torfaen
https://www.torfaen.gov.uk/cy/EducationLearning/ChildrenandYoungPeople/Youngpeople-informationandadvice/Youth-Service.aspx

 

 

Page 3 of 3