EWC Logo

CGA / EWC

Professional development banner
Gwybodaeth am gofrestru ar gyfer cyflogwyr
Gwybodaeth am gofrestru ar gyfer cyflogwyr

1. Cyflwyniad

Mae’r Cod Ymddygiad ac Ymarfer Proffesiynol (‘y Cod’) yn ddogfen allweddol. Mae’n datgan yn glir i gofrestreion CGA y prif safonau ymddygiad ac ymarfer proffesiynol da y mae disgwyl i bob un ohonynt eu cynnal er mwyn parhau i gofrestru. Hefyd, mae’n galluogi dysgwyr a phobl ifanc, a phawb sy’n ymwneud â’u haddysg a’u hyfforddiant yng Nghymru, yn enwedig rhieni/gwarcheidwaid, i wybod beth y dylent ei ddisgwyl gan gofrestreion.

Mae gofyniad cyfreithiol ar CGA o dan y Ddeddf i gyhoeddi cod sy’n amlinellu’r safonau ymddygiad ac ymarfer proffesiynol y mae disgwyl i bersonau cofrestredig eu dangos. Hefyd, mae’r Ddeddf yn gofyn bod CGA yn adolygu ac yn diwygio’r Cod o fewn tair blynedd o’i gyhoeddi, neu ba bryd bynnag y caiff categori cofrestru newydd ei ychwanegu. Adolygwyd fersiwn gyfredol y Cod ddiwethaf ym mis Mai 2024 yn sgil cyflwyno categorïau newydd i’r Gofrestr Ymarferwyr Addysg.

Mae Rheoliadau Cyngor y Gweithlu Addysg (Prif Swyddogaethau) (Cymru) 2015 (y Rheoliadau) yn gofyn bod y Cod yn cynnwys y materion a ganlyn fel darpariaeth sylfaenol:

  • seilio’r berthynas rhwng dysgwyr a phersonau cofrestredig ar ymddiriedaeth a pharch o’r ddwy ochr
  • bod yn ystyriol o ddiogelwch a lles dysgwyr
  • gweithio mewn modd cydweithredol gyda chydweithwyr a gweithwyr proffesiynol eraill
  • datblygu a chynnal perthynas dda â rhieni, gwarcheidwaid a gofalwyr
  • gweithredu â gonestrwydd ac unplygrwydd
  • bod yn sensitif i’r angen am gyfrinachedd, pan fo’n briodol
  • cymryd cyfrifoldeb dros gynnal ansawdd ymarfer proffesiynol
  • cynnal ymddiriedaeth a hyder y cyhoedd yn y gweithlu addysg

Hefyd, mae’r Rheoliadau’n gofyn bod pwyllgor ymchwilio neu briodoldeb i ymarfer CGA yn cyfrif am unrhyw fethiant gan gofrestrai i gydymffurfio â’r Cod mewn unrhyw rai o’r camau disgyblu yn erbyn y person hwnnw.

Wrth ddrafftio’r Cod diwygiedig, mae CGA wedi:

    1. cyfrif am 13 grŵp y gweithlu y mae’n ofynnol bellach i CGA eu cofrestru a’u rheoleiddio i sicrhau bod y Cod yn berthnasol i bawb, yn adlewyrchu pawb ac yn hygyrch i bawb
    2. adolygu codau rheoleiddwyr eraill, ar draws y byd ac ar draws amrywiaeth o broffesiynau
    3. ystyried themâu sy’n dod i’r amlwg o waith achos priodoldeb i ymarfer i lywio meysydd y Cod y mae angen eu cryfhau, o bosibl

Parhaodd y cyfnod ymgynghori ar y Cod diwygiedig drafft rhwng 17 Chwefror a 28 Mawrth 2025.

2. Y broses ymgynghori

Ymgynghori â’r cyhoedd

Lansiwyd yr ymgynghoriad ar 17 Chwefror 2025 ac roedd dolen i ddogfennau’r ymgynghoriad ar gael o wefan CGA. Gallai ymatebion gael eu cyflwyno’n uniongyrchol drwy’r wefan neu drwy’r e-bost. Anfonwyd e-bost at bob rhanddeiliad i gyhoeddi lansio’r ymgynghoriad a darparwyd dolen iddynt i dudalen yr ymgynghoriad.

Marchnata

Cynhaliodd y CGA nifer o weithgareddau i godi ymwybyddiaeth o’r ymgynghoriad ar y Cod, a oedd yn cynnwys cyfathrebu â chofrestreion, cyflogwyr, undebau a rhanddeiliaid eraill gan ddefnyddio’r e-bost, y cyfryngau cymdeithasol, cyhoeddiadau partner, gwefan CGA, chylchlythyr CGA i gofrestreion, gwasg y sector, a sesiynau galw heibio ar-lein.

3. Ymatebion i’r ymgynghoriad – sefydliadau ac unigolion

Cafwyd 19 ymateb yn gyfan gwbl. Dewisodd un ymatebydd ddarparu ymatebion wedi’u personoli yn hytrach na ddefnyddio’r holiadur safonol.

O’r 19 cyflwyniad uniongyrchol, cafwyd ymatebion gan y canlynol:

  • 9 cofrestrai
  • Coleg Penybont
  • Estyn
  • Cyngor Sir y Fflint
  • Grŵp Llandrillo Menai
  • Cyngor Addysgu Cyffredinol yr Alban (GTCS)
  • National Education Union Cymru (NEU)
  • NASUWT Cymru
  • Gofal Cymdeithasol Cymru
  • UCAC
  • UNISON Cymru

Crynodeb o’r Ymatebion

Cwestiwn 1: 1. A yw diben, cwmpas a statws y Cod diwygiedig yn glir ac yn cyd-fynd â deddfwriaeth Llywodraeth Cymru (fel y’u hamlinellir yn y ddogfen ymgynghori)?

 Ydyn 16 88.8% 
 Nac ydyn 0 0%
 Ddim yn cytuno nac yn anghytuno 1 5.6%
 Heb gadarnhau / marcio 1 5.6%
 Cyfanswm 18 100%

Roedd mwyafrif yr ymatebwyr (88.8%) o’r farn bod diben, cwmpas a statws y Cod diwygiedig yn glir ac yn cyd-fynd â deddfwriaeth Llywodraeth Cymru.

Cwestiwn 2(a): A yw’r egwyddorion allweddol (cyfrifoldeb personol, gwybodaeth, unplygrwydd a chydweithio) yn briodol, yn berthnasol i bob grŵp o gofrestreion ac yn eu hadlewyrchu?

 Ydyn 15 83.2% 
 Nac ydyn 1 5.6%
 Ddim yn cytuno nac yn anghytuno 1 5.6%
 Heb gadarnhau / marcio 1 5.6%
 Cyfanswm 18 100%

Roedd mwyafrif yr ymatebwyr (83.2%) o’r farn bod yr egwyddorion allweddol yn briodol i bob grŵp o gofrestreion, yn berthnasol iddynt ac yn eu hadlewyrchu.

Cwestiwn 2(b): A ydych chi’n cytuno bod cyflwyno egwyddor newydd ar arweinyddiaeth yn briodol ac yn berthnasol?

Roedd mwyafrif yr ymatebwyr (61.2%) o’r farn bod yr egwyddor allweddol yn briodol ac yn berthnasol. Gwnaed nifer o sylwadau ac awgrymiadau ynghylch cyflwyno’r egwyddor allweddol hon. Er enghraifft, rhoddodd rhai sylwadau ar bwysigrwydd arweinyddiaeth effeithiol i wella gwasanaethau ac i les ymarferwyr, a nodont fod y safonau hyn, yn gyfiawn, yn fwy manwl a phenodol i weithwyr proffesiynol y mae eu cwmpas a’u cyfrifoldeb (ac, felly, eu heffaith ar ddarparwyr a systemau addysgol) yn ehangach.

Mae sylwadau eraill yn sôn nad dim ond rôl y rhai sydd â chyfrifoldebau arwain a rheoli ffurfiol yw hyrwyddo ac annog diwylliant cadarnhaol yn y gweithle, ac na ddylid peidio ag annog cofrestreion rhag dyheu am ymgorffori’r Cod, arwain trwy esiampl, a hyrwyddo ac annog diwylliant sefydliadol cadarnhaol o barch, unplygrwydd, atebolrwydd, a phroffesiynoldeb.

Awgrymodd rhai ymatebwyr y dylid datgan yn glir at ba grwpiau penodol o arweinwyr a rheolwyr y mae’r egwyddor hon wedi’i hanelu, a’r rhai y tybir eu bod wedi’u heithrio, er enghraifft cynorthwywyr addysgu lefel uwch/rheolwyr iau.

Cwestiwn 3(a): A yw’r disgwyliadau o dan bob egwyddor allweddol (cyfrifoldeb personol, gwybodaeth, unplygrwydd a chydweithio) yn briodol, yn berthnasol i bob grŵp o gofrestreion ac yn eu hadlewyrchu?

 Ydyn 14 77.7% 
 Nac ydyn 1 5.6%
 Ddim yn cytuno nac yn anghytuno 2 11.1%
 Heb gadarnhau / marcio 1 5.6%
 Cyfanswm 18 100%

Roedd mwyafrif yr ymatebwyr (77.7%) o’r farn bod y disgwyliadau o dan bob egwyddor allweddol yn briodol, yn berthnasol i bob grŵp o gofrestreion ac yn adlewyrchu pob grŵp. Gwnaed nifer o sylwadau ac awgrymiadau i wella’r disgwyliadau:

Roedd rhai ymatebwyr yn pryderu am y cyfeiriad at gyfrifoldeb ‘personol’ yn ogystal â phroffesiynol, sef bod potensial gan ‘personol’ i effeithio ar yr hawl i fywyd preifat.

Yn ogystal, gellir diwygio’r cyfeiriad at ‘dysgwyr a phobl ifanc’ i ‘dysgwyr a phobl ifanc y maent yn gyfrifol yn broffesiynol amdanynt’, neu eiriad tebyg, neu effaith y disgwyliadau yw estyn cyfrifoldebau cofrestreion y tu hwnt i’r hyn sy’n rhesymol – caiff cyfrifoldebau cyhoeddus ehangach eu cipio’n ddigonol mewn egwyddorion a disgrifiadau eraill.

Holodd ymatebwyr eraill p’un a ddylid mireinio ymhellach y disgwyliad nad yw cofrestreion yn cael eu hamharu gan alcohol neu sylweddau eraill, a holont p’un a oedd ymestyn y disgwyliadau eraill – fel y rhai sy’n gysylltiedig â chyllid ac arholiadau – yn angenrheidiol ai peidio.

Holodd rhai ymatebwyr p’un a oedd geiriau penodol fel ‘moesegol’, ‘cynwysoldeb’, ‘ymatebol’, ‘yn y gwaith’, ‘ffigur cyhoeddus’ yn glir, a/neu yn angenrheidiol, a/neu yn creu beichiau ychwanegol i gofrestreion.

Cwestiwn 3(b): A ydych chi’n cytuno bod y disgwyliadau ar gyfer arweinwyr a phobl â chyfrifoldebau rheoli yn briodol ac yn berthnasol?

 Ydyn 12 66.7% 
 Nac ydyn 0 0%
 Ddim yn cytuno nac yn anghytuno 2 11.1%
 Heb gadarnhau / marcio 4 22.2%
 Cyfanswm 18 100%

Roedd mwyafrif yr ymatebwyr (66.7%) o’r farn bod disgwyliadau yn yr egwyddor allweddol hon yn briodol ac yn berthnasol. Gwnaed nifer o sylwadau ac awgrymiadau ynghylch y disgwyliadau o dan yr egwyddor allweddol hon.

Roedd rhai ymatebwyr o’r farn y dylai’r disgwyliadau ar arweinwyr a’r bobl â chyfrifoldebau rheoli gael eu hymestyn ymhellach i gynnwys cyfrifoldeb am iechyd, diogelwch a llesiant staff, neu gefnogi llesiant y gweithlu.

Gwnaeth ymatebwyr eraill sylwadau y dylai’r disgwyliadau sy’n cael eu nodi’n benodol o dan yr egwyddor newydd hon fod yn berthnasol i gofrestreion yn gyffredinol.

Cwestiwn 4: A yw’r Cod yn cynnig sicrwydd i ddysgwyr, rhieni, gwarcheidwaid a’r cyhoedd am ymddygiad ac ymarfer y gweithlu addysg?

Roedd mwyafrif yr ymatebwyr (66.7%) o’r farn bod y Cod yn cynnig sicrwydd i ddysgwyr, rhieni, gwarcheidwaid a’r cyhoedd am ymddygiad ac ymarfer y gweithlu addysg.

Cwestiwn 5: Hoffem wybod eich barn am yr effeithiau y byddai’r Cod Ymddygiad ac Ymarfer Proffesiynol drafft i gofrestreion Cyngor y Gweithlu Addysg yn eu cael ar y Gymraeg, yn benodol:
(a) ar gyfleoedd i bobl ddefnyddio’r Gymraeg; ac
(b) ar beidio â thrin yn Gymraeg yn llai ffafriol na’r Saesneg

Caniataodd y cwestiwn ymateb ‘testun rhydd’ ac roedd y prif sylwadau’n gysylltiedig â chydnabod y dylai CGA barhau i ymrwymo i ddarparu gwasanaeth dwyieithog.

Cwestiwn 6: A oes gennych unrhyw sylwadau eraill?

Cafwyd amrywiaeth o sylwadau eraill gan ymatebwyr, er enghraifft yn gysylltiedig â gweithwyr cymorth mewn ysgolion, Canllawiau Arfer Da CGA, dyluniad a graffigwaith y Cod, ac awgrymiadau am sut i ehangu’r Cod ymhellach.

4. Y camau nesaf

Hoffai CGA ddiolch i bawb a ymatebodd i’r ymgynghoriad hwn. Bydd adborth yn cael ei adolygu wrth lunio’r diweddariad i’r Cod yn derfynol.

Yna, bydd fersiwn newydd y Cod yn cael ei chyhoeddi ym mis Medi 2025.

Cyngor y Gweithlu Addysg (CGA) ydym ni, sef rheoleiddiwr proffesiynol, annibynnol y gweithlu addysg yng Nghymru, a sefydlwyd gan Ddeddf Addysg (Cymru) 2014 (y Ddeddf).

Rydym ni’n cofrestru ac yn rheoleiddio ymarferwyr addysg ar draws ysgolion, addysg bellach, gwaith ieuenctid ac addysg oedolion/dysgu seiliedig ar waith, ac rydym yn gweithio er budd y cyhoedd i gynnal proffesiynoldeb a gwella safonau ar draws y sectorau hyn.

Yr enw ar ymarferwyr ar ein Cofrestr Ymarferwyr Addysg yw ‘cofrestreion’ ac maent yn cynnwys y categorïau canlynol:

  • athrawon ysgol
  • gweithwyr cymorth dysgu mewn ysgolion
  • athrawon ysgolion annibynnol
  • gweithwyr cymorth dysgu mewn ysgolion annibynnol
  • athrawon addysg bellach*
  • gweithwyr cymorth dysgu mewn addysg bellach
  • penaethiaid neu uwch arweinwyr sy’n gweithio mewn sefydliadau addysg bellach
  • athrawon sefydliadau annibynnol arbennig ôl-16
  • gweithwyr cymorth dysgu mewn sefydliadau annibynnol arbennig ôl-16
  • ymarferwyr dysgu seiliedig ar waith
  • ymarferwyr addysg oedolion*
  • gweithwyr ieuenctid*
  • gweithwyr cymorth ieuenctid*

* mae gan y categorïau cofrestru hyn gymwysterau gofynnol. Am ragor o wybodaeth, ewch i www.cga.cymru/cofrestru.

Mae cofrestreion yn gweithio mewn amrywiaeth eang o leoliadau addysg a hyfforddiant, gydag amrywiol lefelau o gyfrifoldeb, ar draws meysydd ymarfer gwahanol.

Mae’n ofynnol i bob cofrestrai gynnal y safonau a amlinellir yn y Cod hwn.

Y Cod

Mae gofyniad cyfreithiol arnom o dan y Ddeddf i gyhoeddi cod sy’n amlinellu’r safonau ymddygiad ac ymarfer proffesiynol a ddisgwylir gan unigolion sydd wedi cofrestru gyda ni.

Mae ein Cod yn datgan yn glir i’n cofrestreion y prif safonau ymddygiad ac ymarfer proffesiynol da y mae disgwyl i bob un ohonynt eu cynnal er mwyn parhau i gofrestru. Hefyd, mae’n galluogi dysgwyr a phobl ifanc, a phawb sy’n ymwneud â’u haddysg a hyfforddiant yng Nghymru, yn enwedig rhieni/gwarcheidwaid, i wybod beth y dylent ei ddisgwyl gan gofrestreion.

Lle nad yw disgwyliadau’n cael eu bodloni, gallem benderfynu ymchwilio a gwrando ar honiadau sy’n cael eu hatgyfeirio i ni er mwyn penderfynu p’un a ddylai cofrestriad ymarferwr barhau; mae gennym bwerau cyfreithiol i wneud hyn. Mae pob achos sy’n destun ymchwiliad a gwrandawiad yn cael ei ystyried ar sail ei rinweddau ei hun, gan gynnwys lleoliad cyflogaeth y cofrestrai dan sylw.

Mae’r Cod yn fan cyfeirio pwysig ar gyfer penderfynu p’un a ddylai unrhyw honiadau sy’n cael eu canfod yn wir arwain at gosb ddisgyblu gymesur.

Hefyd, mae’r Cod yn ein helpu i benderfynu a yw’r bobl sy’n gwneud cais i gofrestru gyda ni yn addas.

Y chwe egwyddor allweddol

Mae cofrestreion, gan gynnwys cofrestreion sydd wedi’u cofrestru dros dro, yn ymrwymo i gynnal egwyddorion allweddol: Cyfrifoldeb Personol a Phroffesiynol, Unplygrwydd Proffesiynol, Cydweithio, Arweinyddiaeth, Gwybodaeth a Dealltwriaeth Broffesiynol, a Dysgu Proffesiynol.

A. Ymddygiad Proffesiynol

1. Cyfrifoldeb Personol a Phroffesiynol

Mae cofrestreion:

  1. yn cydnabod eu cyfrifoldeb personol fel model o ymddygiad a ffigur cyhoeddus, i gynnal ffydd a hyder y cyhoedd yn y proffesiynau addysg, a hynny yn y gweithle a thu allan iddo
  2. yn cynnal perthnasoedd â dysgwyr a phobl ifanc yn broffesiynol, drwy:
    1. gyfathrebu â dysgwyr a phobl ifanc yn barchus, mewn ffordd sy’n briodol iddynt
    2. defnyddio pob math o gyfathrebu mewn modd priodol a chyfrifol, yn arbennig y cyfryngau cymdeithasol
    3. sicrhau bod unrhyw gysylltiad corfforol yn angenrheidiol, yn rhesymol ac yn gymesur
    4. cyfrannu at greu amgylchedd dysgu teg a chynhwysol drwy fynd i’r afael â gwahaniaethu, ystrydebu a bwlio
    5. cynnal ffiniau proffesiynol
  3. yn ymgysylltu â dysgwyr a phobl ifanc i annog hyder, grymuso, datblygiad addysgol a datblygiad personol
  4. yn meddu ar ddyletswydd gofal dros ddiogelwch dysgwyr a phobl ifanc a’u llesiant corfforol, cymdeithasol, moesol ac addysgol, drwy:
    1. roi buddiannau dysgwyr a phobl ifanc yn gyntaf
    2. gweithredu ynghylch unrhyw beth a allai beryglu diogelwch neu lesiant dysgwr neu berson ifanc
    3. rhoi gwybod, yn unol â 4.3, am unrhyw fater diogelu, neu unrhyw fater arall a allai o bosibl niweidio diogelwch neu lesiant dysgwr neu berson ifanc
    4. bod yn addas i ymarfer, sy’n cynnwys peidio ag yfed alcohol na bod o dan ddylanwad alcohol neu unrhyw sylwedd arall tra byddant yn y gwaith
  5. yn rheoli eu hiechyd, eu diogelwch a’u llesiant personol eu hunain, a’u bod yn ymwybodol o iechyd, diogelwch a llesiant personol eu cydweithwyr
  6. yn parchu ac yn ymrwymo i gydraddoldeb, cynwysoldeb ac amrywiaeth
  7. yn deall bod y Cod yn berthnasol yn syth adeg eu cynnwys ar y Gofrestr, wrth adnewyddu cofrestriad a thrwy gydol y cyfnod cyflogaeth pan mae’n ofynnol cofrestru gyda CGA, gan gynnwys cyfnodau Sefydlu statudol a chyfnodau prawf

2. Unplygrwydd Proffesiynol

Mae cofrestreion:

  1. yn atebol am eu hymddygiad a’u cymhwysedd proffesiynol
  2. yn ymddwyn yn onest, yn foesegol, gydag unplygrwydd, yn enwedig o ran:
    1. cyllid ac arian yn y gweithle, yn enwedig y rhai sy’n gyfrifol am reoli / dosbarthu cyllid mewn sefydliadau addysg sy’n cael eu hystyried yn fusnesau
    2. rhinweddau, profiad a chymwysterau personol
    3. geirdaon, datganiadau a wneir (yn enwedig yn gysylltiedig â cheisiadau i gofrestru gyda CGA, a chyflogaeth), ac wrth lofnodi dogfennau
    4. asesu a thasgau’n gysylltiedig ag arholiadau, gan sicrhau bod canlyniadau’n adlewyrchu gallu a gwybodaeth ymgeiswyr yn gywir
    5. eiddo a chyfleusterau eu cyflogwr
    6. cyfathrebu â CGA, gan ei hysbysu am unrhyw euogfarn droseddol neu rybuddiad cofnodadwy, neu gyfyngiad a osodir ar eu hymarfer gan unrhyw gorff arall
    7. eu cyflogwr, ac adrodd am unrhyw fater sy’n ofynnol yn ôl telerau ac amodau eu cyflogaeth
    8. eu hymddygiad yn y gweithle a thu allan iddo
  3. yn ymdrin â gwybodaeth a data mewn modd priodol, gan gymhwyso’r protocolau angenrheidiol i faterion yn ymwneud â chyfrinachedd, sensitifrwydd a datgelu
  4. yn glynu wrth safonau ymddygiad cyfreithlon, mewn modd sy’n cyd-fynd â’u statws fel un o gofrestreion CGA

3. Cydweithio

Mae cofrestreion:

  1. yn parchu, yn cynorthwyo ac yn cydweithio â chydweithwyr, dysgwyr, pobl ifanc ac eraill i gyflawni’r deilliannau dysgu gorau
  2. yn rhannu profiad a gwybodaeth i helpu eu hunain ac ymarferwyr eraill i ddatblygu a chynnal arfer gorau (gweler Adran B)
  3. yn ceisio datblygu a chynnal perthnasoedd gwaith proffesiynol ac ymatebol â rhieni, gwarcheidwaid, gofalwyr a rhanddeiliaid eraill
  4. yn cyfathrebu mewn modd priodol ac effeithiol gyda phob un sy’n gysylltiedig ag addysg dysgwyr a phobl ifanc

4. Arweinyddiaeth

Mae cofrestreion â chyfrifoldebau arwain a rheoli yn:

  1. yn ymgorffori’r Cod ac yn arwain trwy esiampl
  2. yn hyrwyddo ac yn annog diwylliant sefydliadol cadarnhaol o barch, unplygrwydd, atebolrwydd a phroffesiynoldeb
  3. yn rheoli staff, adnoddau a risg yn effeithiol, gan gynnwys er mwyn sicrhau bod yr holl staff yn gallu cael at y cymorth, yr hyfforddiant a’r oruchwyliaeth angenrheidiol i fodloni’r safonau disgwyliedig
  4. yn atebol am benderfyniadau ac am ddirprwyo tasgau

B. Ymarfer Proffesiynol

5. Gwybodaeth a Dealltwriaeth Broffesiynol

Mae cofrestreion:

  1. yn gwybod y safonau proffesiynol sy’n berthnasol i’w proffesiwn/sector penodol mewn addysg, ac yn eu bodloni, drwy gydol eu gyrfa
  2. yn gwybod, yn deall ac yn cydymffurfio â pholisïau, gweithdrefnau a chanllawiau cyfredol sy’n berthnasol i’w hymarfer
  3. yn gwybod, yn deall ac yn cydymffurfio â pholisïau, gweithdrefnau a chanllawiau diogelu cyfredol sy’n berthnasol i’w hymarfer
  4. lle bo angen, yn ceisio cymorth, cyngor ac arweiniad ac yn agored i adborth, gan ymateb iddo mewn modd cadarnhaol ac adeiladol

6. Dysgu Proffesiynol

Mae cofrestreion:

  1. yn dangos ymrwymiad ar y cyd i’w dysgu proffesiynol parhaus drwy fyfyrio ar eu hymarfer a’i werthuso, sicrhau bod eu gwybodaeth a’u sgiliau proffesiynol yn gyfredol a chymryd camau i wella ansawdd eu hymarfer, lle bo angen

Cyhoeddi ac adolygu

Mae’r Cod ar gael yn rhad ac am ddim ar ein gwefan ar ffurf hawdd ei ddarllen, testun bras a fformatau eraill, os oes angen.

Mae’r Cod hwn yn disodli’r Cod Ymddygiad ac Ymarfer Proffesiynol ar gyfer cofrestreion, a gyhoeddwyd gennym ar 10 Mai 2024. Yn unol â’r Ddeddf, byddwn yn adolygu’r Cod hwn bob tair blynedd.

Mae ein canllawiau arfer da yn ategu’r Cod hwn ac maent ar gael ar ein gwefan.