Gwasanaeth Ieuenctid Sir y Fflint a Gwasanaeth Ieuenctid Bro Morgannwg yw'r sefydliadau diweddaraf i gael cydnabyddiaeth ffurfiol am ansawdd eu darpariaeth, gan gael y Marc Ansawdd ar gyfer Gwaith Ieuenctid (MAGI) efydd ac aur.

Mae'r Marc Ansawdd (a gyllidir gan Lywodraeth Cymru ac a weinyddir gan Gyngor y Gweithlu Addysg (CGA)), yn wobr genedlaethol sy'n arddangos ardderchowgrwydd sefydliad. I gael achrediad, mae'n rhaid i sefydliadau hunanasesu yn erbyn set o safonau ansawdd, a phasio asesiad allanol.

Drwy gael y MAGI efydd, mae Sir y Fflint wedi dangos eu bod wedi sefydlu seiliau hanfodol ar gyfer gwaith ieuenctid o ansawdd uchel. Mae hyn yn cynnwys ymgysylltu gyda phobl ifanc i lunio'r ddarpariaeth, dealltwriaeth gref o anghenion y rheiny y maent yn eu cefnogi, a pholisïau, gweithdrefnau, a chanllawiau gwydn i sicrhau ymdriniaeth ddiogel ac effeithiol.

Wrth gael y MAGI aur, mae Bro Morgannwg wedi dangos cryfder cydweithio gyda phartneriaid, defnyddio gwybodaeth rheoli yn effeithiol, a defnyddio adnoddau i fodloni anghenion pobl ifanc mewn modd creadigol. Mae'r wobr hefyd yn cydnabod a dathlu cyraeddiadau pobl ifanc, a'r effaith mae gwaith ieuenctid a gweithwyr ieuenctid wedi ei gael ar eu siwrneiau personol.

Dywedodd Tara Reddy, Swyddog Datblygu'r Marc Ansawdd gyda CGA, "Llongyfarchiadau enfawr i'r ddau sefydliad ar y llwyddiannau yma.

"Dyma'r MAGI cyntaf i Sir y Fflint. Yn aml, y cam cyntaf yw'r anoddaf, ac rwyf wrth fy modd bod eu gwaith caled wedi ei gydnabod yn ffurfiol.

"I Fro Morgannwg, mae cael y wobr aur, ar ôl cael yr efydd a'r arian, yn gamp enfawr. Mae'n dangos bod MAGI yn helpu sefydliadau o bob cwr o Gymru i dyfu a gwella'r gwasanaethau y maent yn eu cynnig i'n pobl ifanc."

Gan siarad ar ôl cyflwyno'r wobr, dywedodd Martin Dacey, Swyddog Arweiniol ar gyfer Cynhwysiant a Lles Cymdeithasol ym Mro Morgannwg: "Mae hwn yn gyflawniad gwych, ac yn gydnabyddiaeth o'r holl waith y mae Rhys a'r Gwasanaeth Ieuenctid yn ei wneud gyda'n pobl ifanc. Ry'n ni mor falch o'u cyraeddiadau. Diolch yn fawr i'n holl staff gwych!”

I gael mwy o wybodaeth am MAGI, gan gynnwys sut gall eich sefydliad gael achrediad, neu sut allwch chi fod yn asesydd, ewch i wefan CGA.

Mae Cyngor y Gweithlu Addysg (CGA) wedi ymuno â sefydliadau eraill ledled Cymru i gymryd rhan yn ymgyrch Defnyddia dy Gymraeg.

Mae'r ymgyrch, wedi’i harwain gan Gomisiynydd y Gymraeg, yn alwad i weithredu i sefydliadau ac unigolion groesawu a defnyddio'r Gymraeg yn eu rhyngweithiadau dyddiol gartref, yn y gwaith, wrth gymdeithasu, ac wrth ddefnyddio gwasanaethau.

Dywedodd Bethan Holliday-Stacey, Cyfarwyddwr Datblygiad Proffesiynol, Achredu a Pholisi CGA "A ninnau’n sefydliad cwbl ddwyieithog sy'n gweithredu yng Nghymru, rydym yn gwybod pa mor bwysig yw'r Gymraeg i'n diwylliant. Dyna pam rydym wedi ymrwymo'n gadarn i wreiddio a hyrwyddo ei defnydd ym mhob agwedd o'n gwaith.

"Nid yn unig y mae ein holl wasanaethau ac adnoddau ar gael yn y Gymraeg a'r Saesneg, ond rydym hefyd yn gweithio'n rhagweithiol i hyrwyddo gyrfaoedd i siaradwyr Cymraeg, gan weithio'n weithredol i helpu i gynyddu nifer y rheiny sy'n ymarfer trwy gyfrwng y Gymraeg.

"Mae'r ymroddiad hwn yn berthnasol i'n rôl fel cyflogwr, hefyd. Rydym eisiau i'n hamgylchedd gwaith fod yn gynhwysol, ac yn un sy'n dathlu amrywiaeth ieithyddol ein staff. Rydym yn falch o ddweud bod 36% o'n gweithlu yn siarad Cymraeg, ac yn annog pawb i ddefnyddio pa Gymraeg bynnag sydd ganddyn nhw yn ystod y diwrnod gwaith".

A ninnau’n sefydliad sector cyhoeddus, mae'n ofynnol i CGA gydymffurfio â nifer o safonau'r Gymraeg. Gallwch ddarllen yr adroddiad monitro blynyddol diweddaraf ar y wefan sy'n rhoi gwybodaeth am eu cydymffurfiaeth ac yn amlinellu sut mae wedi gweithredu'r safonau.

I gael mwy o wybodaeth am y gwasanaethau dwyieithog y mae'r CGA yn eu cynnig, ewch i'r wefan.

Mae Cyngor y Gweithlu Addysg (CGA) wedi cyhoeddi’r diweddaraf yn ei gyfres o ganllawiau arfer da, gan ganolbwyntio’r tro hwn ar arfer myfyriol.

Mae’r canllaw, sydd wedi’i anelu at holl gofrestreion CGA, yn amlinellu elfennau hanfodol arfer myfyriol, yn trafod y buddion, ac yn cynnig awgrymiadau ymarferol ar gyfer ei ddefnyddio’n effeithiol. Yn yr un modd â phob canllaw arfer da, mae’n amlygu sut gall y wybodaeth ynddo helpu i gynorthwyo cofrestreion i gynnal y safonau uchel sydd wedi’u gosod gan y proffesiwn a chydymffurfio â’r Cod Ymddygiad ac Ymarfer Proffesiynol.

Wrth gyhoeddi’r canllaw, dywedodd Bethan Holliday-Stacey, Cyfarwyddwr Datblygiad Proffesiynol, Achredu a Pholisi, “Mae ymarfer myfyriol yn ganolog i dwf proffesiynol. Ei nod yn ein canllaw newydd yw grymuso ein cofrestreion i gymryd cam yn ôl, meddwl am eu hymarfer proffesiynol, a’i ddadansoddi, y cyfan â’r nod o wella’n barhaus.”

Un adnodd penodol sy’n cael ei amlygu yn y canllaw i ategu myfyrdod yw’r Pasbort Dysgu Proffesiynol (PDP). Mae’r PDP, a ariennir gan Lywodraeth Cymru ac a gyflwynir gan CGA, yn e-bortffolio ar-lein hyblyg sydd ar gael i holl gofrestreion CGA. Mae’n llawn nodweddion a luniwyd i’w cynorthwyo i gipio’u dysgu, myfyrio arno, ei rannu a’i gynllunio.

Mae’r canllaw yn dilyn rhyddhau Arwain Ymarfer Myfyriol – Adolygu'r Dystiolaeth, sef papur ymchwil a gomisiynwyd ar y cyd gan CGA a’r Academi Genedlaethol ar gyfer Arweinyddiaeth Addysgol. Mae’r papur, a ysgrifennwyd gan yr Athro Carol Campbell a Maeva Ceau o Sefydliad Ontario ar gyfer Astudiaethau mewn Addysg ym Mhrifysgol Toronto, yn cynnig adolygiad manwl sy’n archwilio cysyniadau ymarfer myfyriol, ei effeithiau sylweddol ar addysg, a’r arferion arwain sy’n ei ategu a’i annog.

Mae’r canllaw ar gael i’w ddarllen nawr, ochr yn ochr â gweddill y gyfres canllawiau arfer da, ar wefan CGA.

Mae Cyngor y Gweithlu Addysg wrth (CGA) eu bodd i gyhoeddi'r Athro Rose Luckin fel prif siaradwr Siarad yn Broffesiynol 2025 'Cofleidio deallusrwydd artiffisial (AI) mewn addysg: cyfleoedd, heriau ac ystyriaethau moesegol'.

Mae Rose yn ysgolhaig uchel ei pharch yn rhyngwladol ac yn gyfathrebwr dylanwadol ym maes addysg a thechnoleg, yn enwedig Deallusrwydd Artiffisial (AI). Gyda dros chwarter canrif o brofiad, mae hi'n arbenigwr amlwg ar AI mewn addysg, ac yn gynghorydd i lunwyr polisi, llywodraethau a diwydiant yn fyd-eang.

Yn narlith Siarad yn Broffesiynol, bydd Rose yn archwilio potensial trawsnewidiol AI mewn addysg yng Nghymru. Bydd hi'n mynd i'r afael gyda sut mae technolegau AI eisoes yn cael effaith, tra'n rhoi mewnwelediadau i dueddiadau'r dyfodol y dylai addysgwyr eu disgwyl.

Wrth edrych ymlaen at y digwyddiad dywedodd Prif Weithredwr CGA, Hayden Llewellyn "Ry'n ni wrth ein bodd i groesawu Rose fel y prif siaradwr ar gyfer ein digwyddiad Siarad yn Broffesiynol ym mis Ionawr.

"Mae AI yn prysur ddod yn rhan hanfodol o'n bywydau o ddydd i ddydd. Yn ein darlith 2025, bydd Rose yn rhoi strategaethau ymarferol ar gyfer ymgorffori AI yn effeithiol, tra'n ein llywio ni drwy ystyriaethau moesegol a mesurau diogelu.

"Mae'n siŵr o fod yn ddigwyddiad na ddylid ei golli."

Siarad yn Broffesiynol yw'r digwyddiad mwyaf mawreddog o gyfres o ddigwyddiadau CGA, y maent yn eu cynnal i gefnogi cofrestreion yn eu harfer o ddydd i ddydd. Mae siaradwyr y gorffennol wedi cynnwys yr Athrawon Pasi Sahlberg, Michael Fullan, Andy Hargreaves, a Yong Zhao.

Mae mwy o wybodaeth am y digwyddiad, gan gynnwys sut i gofrestru am docyn am ddim ar wefan CGA nawr.