Dyddiad cyhoeddi: 25 Mehefin 2026

Canfu’r Pwyllgor Priodoldeb i Ymarfer fod yr honiadau canlynol wedi’u profi, sef, tra oedd yn cael ei chyflogi yng Nghanolfan Asesu’r Bont, fod Mrs Forward:

1. ar neu o gwmpas 27 Ebrill 2022, wedi cwblhau cofrestr bresenoldeb y Ganolfan ar gyfer sesiwn y prynhawn gan ddatgan bod Disgybl A a Disgybl B yn bresennol yn y dosbarth pan nad oeddent
2. ar neu o gwmpas 28 Ebrill 2022, wedi dweud wrth Reolwr y Ganolfan fod Disgybl A a Disgybl B wedi bod yn bresennol yn sesiwn y prynhawn ar 27 Ebrill 2022 pan nad oeddent
3. ar neu o gwmpas 8 Medi 2023, wedi anfon Disgybl C adref o’r Ganolfan:
   1. heb roi gwybod i’w riant neu ofalwr
   2. heb roi gwybod i’r Uwch Dîm Arweinyddiaeth

Ar ôl gwneud y canfyddiadau hyn, penderfynodd y Pwyllgor hefyd fod ymddygiad Mrs Forward yn anonest ac yn dangos diffyg unplygrwydd.

Gosododd y Pwyllgor Priodoldeb i Ymarfer Orchymyn Gwahardd, gan ddileu Mrs Forward o’r Gofrestr Ymarferwyr Addysg yn y categori gweithiwr cymorth dysgu mewn ysgol ac athrawes addysg bellach am gyfnod amhenodol. Penderfynodd hefyd na chaiff Mrs Forward wneud cais i gael ei hadfer i’r Gofrestr Ymarferwyr Addysg cyn i gyfnod o 2 flynedd fynd heibio. Os na fydd Mrs Forward yn gwneud cais llwyddiannus am gymhwysedd i gael ei hadfer i’r Gofrestr ar ôl 11 Mehefin 2028, bydd yn aros wedi’i gwahardd am gyfnod amhenodol.

Mae gan Mrs Forward hawl i apelio i’r Uchel Lys o fewn 28 niwrnod.

Dyddiad cyhoeddi: 17 Mehefin 2026

Mae Pwyllgor Priodoldeb i Ymarfer Cyngor y Gweithlu Addysg (CGA), oedd yn eistedd yn rhithiol ar 9-11 Mehefin 2026, wedi canfod bod honiadau o ymddygiad proffesiynol annerbyniol wedi eu profi yn erbyn gweithiwr cymorth dysgu, Eleri Haf Parry.   

Canfu'r Pwyllgor, tra fod Miss Parry wedi ei chyflogi yn Ysgol y Gorlan, yn neu o gwmpas mis Medi 2022, nes yn neu o gwmpas mis Mehefin 2024, ar fwy nag un achlysur, ei bod wedi diwygio gwybodaeth Disgybl A a/neu Disgybl B ar SIMS (system rheoli gwybodaeth yr ysgol), o fod yn absennol i fod yn bresennol.

Canfu'r pwyllgor bod ymddygiad Miss Parry yn gamarweiniol, anonest, a heb hygrededd.

Rhoddodd y Pwyllgor Priodoldeb i Ymarfer Orchymyn Gwahardd (heb amodau) ar gofrestriad Miss Parry fel gweithiwr cymorth dysgu ysgol am gyfnod o ddwy flynedd (rhwng 11 Mehefin 2026 a 11 Mehefin 2028). O'r herwydd ni fydd Miss Parry yn gallu gweithio fel gweithiwr cymorth dysgu ysgol mewn ysgol a gynhelir, neu ysgol arbennig na chynhelir yng Nghymru am gyfnod y Gorchymyn Gwahardd. 

Mae gan Miss Parry'r hawl i apelio i'r Uchel Lys o fewn 28 diwrnod. 

Dyddiad cyhoeddi: 2 Mehefin 2026

Mae Pwyllgor Priodoldeb i Ymarfer Cyngor y Gweithlu Addysg (CGA), a oedd yn eistedd o bell ar 16-19 Mawrth, a 21 Mai 2026, wedi canfod bod honiad o ymddygiad proffesiynol annerbyniol wedi’i brofi yn erbyn y gweithiwr cymorth dysgu mewn ysgol, Joan Morgan.

Canfu’r Pwyllgor Priodoldeb i Ymarfer fod yr honiadau canlynol wedi’u profi, sef, tra oedd yn cael ei chyflogi gan Ysgol Llwyn yr Eos fel gweithiwr cymorth dysgu mewn ysgol, bod Mrs Morgan:

1. Ar neu o gwmpas 16 Mehefin 2023:
   1. wedi rhoi ei bys(edd) i mewn i geg Disgybl A
   2. wedi tynnu Disgybl A wrth ei fraich

Gosododd y Pwyllgor Priodoldeb i Ymarfer Orchymyn Gwahardd, gan ddileu Mrs Morgan o’r Gofrestr Ymarferwyr Addysg yn y categori gweithiwr cymorth dysgu mewn ysgol am gyfnod amhenodol.

Penderfynodd hefyd na chaiff Mrs Morgan wneud cais i gael ei hadfer i’r Gofrestr Ymarferwyr Addysg cyn i gyfnod o 2 flynedd fynd heibio. Os na fydd Mrs Morgan yn gwneud cais llwyddiannus am gymhwysedd i gael ei hadfer i’r Gofrestr ar ôl 21 Mai 2028, bydd yn aros wedi’i gwahardd am gyfnod amhenodol.

Mae gan Mrs Morgan hawl i apelio i’r Uchel Lys o fewn 28 niwrnod.

Dyddiad cyhoeddi: 1 Mehefin 2026

Mae Pwyllgor Priodoldeb i Ymarfer Cyngor y Gweithlu Addysg (CGA), a oedd yn eistedd o bell ar 19 a 20 Mai 2026, wedi canfod bod honiad o ‘ymddygiad proffesiynol annerbyniol’ wedi’i brofi yn erbyn y gweithiwr cymorth dysgu mewn ysgol, Lee-Ann Thomas.

Canfu’r Pwyllgor Priodoldeb i Ymarfer fod yr honiadau canlynol wedi’u profi, sef, tra oedd yn cael ei chyflogi fel Cynorthwy-ydd Addysgu a/neu Gynorthwy-ydd Goruchwylio a/neu Gynorthwy-ydd Cegin Cyffredinol y Clwb Brecwast yn Ysgol Gynradd Gwaunmeisgyn, bod Miss Thomas:

• wedi gafael yng nghydweithiwr a’i ddal wrth ei fraich dde
• ar un achlysur neu fwy, wedi ysgwyd braich dde cydweithiwr
• wedi gwasgu un neu fwy o’i bysedd i mewn i fraich dde cydweithiwr
• wedi gweiddi ar gydweithiwr

Gosododd y Pwyllgor Priodoldeb i Ymarfer Gerydd ar gofrestriad Miss Thomas fel gweithiwr cymorth dysgu mewn ysgol am gyfnod o 2 flynedd (o 20 Mai 2026 tan 20 Mai 2028).

Fel y cyfryw, bydd Miss Thomas yn gallu gweithio fel cofrestrai (gweithiwr cymorth dysgu mewn ysgol) mewn ysgol a gynhelir neu ysgol arbennig nas cynhelir yng Nghymru ar hyd cyfnod y Cerydd.

Mae gan Miss Thomas hawl i apelio i’r Uchel Lys o fewn 28 niwrnod.